கிருஷ்ணகிரி மாவட்டம், பர்கூருக்கு அருகே பள்ளி மாணவியிடம் அத்துமீறிய வழக்கில் கைதுசெய்யப்பட்ட நாம் தமிழர் கட்சியின் முன்னாள் நிர்வாகியும், `போலி’ என்.சி.சி மாஸ்டருமான சிவராமன் கடந்த மாதம் 19-ம் தேதி அதிகாலை வலது கால் முறிந்த நிலையில், தனிப்படை போலீஸாரால் கைதுசெய்யப்பட்டு, அவர்கள் மூலமாகவே கிருஷ்ணகிரி அரசு மருத்துவமனையில் அனுமதிக்கப்பட்டிருந்தார். கைதுக்கு முன்னதாகவே `குற்ற’ உணர்ச்சிக்காரணமாக எலி மருந்து சாப்பிட்டிருந்த சிவராமன் கடந்த மாதம் 23-ம் தேதி விடியற்காலை சிகிச்சைப் பலனின்றி உயிரிழந்துவிட்டார். முன்னதாக 22-ம் தேதி இரவு 10:15 மணிக்கு சிவராமனின் தந்தை அசோக்குமாரும் விபத்தில் சிக்கி, சம்பவ இடத்திலேயே இறந்துவிட்டார். இந்தக் காட்சிகள் சிசிடிவி கேமராவிலும் பதிவாகியிருக்கின்றன.
இந்த வழக்கில், கந்திகுப்பத்தில் செயல்பட்டுவரும் தனியார் பள்ளியின் தாளாளர் சாம்சன் வெஸ்லி, பள்ளியின் முதல்வர் சதீஷ்குமார், ஆசிரியைகள் கோமதி, ஜெனிஃபர், பயிற்சியாளர்கள் சத்யா, சிந்து, சுப்பிரமணியம், சக்திவேல் உள்ளிட்ட 11 பேர் உடந்தையாக இருந்த குற்றத்துக்காக `போக்சோ’ சட்டத்தின்கீழ் கைதுசெய்யப்பட்டு, ஏற்கெனவே சிறையில் அடைக்கப்பட்டிருக்கின்றனர். இந்தப் பள்ளி விவகாரத்தில், மேலும் 13 மாணவிகள் பாலியல் தொல்லைக்கு ஆளானதாகவும் தகவல்கள் வெளியாகின.
இதையடுத்து, முதலமைச்சர் மு.க.ஸ்டாலின் உத்தரவின்பேரில் அமைக்கப்பட்ட சிறப்புப் புலனாய்வுக்குழுவினரும், பன்நோக்கு குழுவினரும் விசாரணையைத் தீவிரப்படுத்தினர். இதனால், கைதுப் படலமும் தொடர்ந்துகொண்டிருக்கிறது.
