ஆளுநரின் இந்தப் பேச்சு பெரும் சர்ச்சையை ஏற்படுத்த, தி.மு.க இளைஞரணி தலைவரும், விளையாட்டுத்துறை அமைச்சருமான உதயநிதி ஸ்டாலின், “என்னைப் பொறுத்தவரையில் மாணவர்களை சுயமாக சிந்திக்கத் தூண்டுகிற கல்வி முறைதான் சிறந்த கல்விமுறை. அப்படி பார்த்தால், இந்தியாவிலேயே தமிழ்நாட்டு கல்வி முறைதான் மாணவர்களை சிந்திக்க வைக்கின்ற, எதையும் ஏன், எதற்கு, எப்படி என்று கேள்வி கேட்கும் கல்வி முறையாக அமைந்திருக்கிறது. ஆனால், இன்றைக்கு சிலர் நமது தமிழ்நாடு அரசின் பாடத் திட்டம் சரியில்லை என புரளியை கிளப்பிவிட்டிருக்கின்றனர். அரசு பள்ளியில் பயின்ற இஸ்ரோ விஞ்ஞானிகள் மயில்சாமி அண்ணாதுரை, வீர முத்துவேல் போன்றோர் இருக்கின்றனர்.
நமது அரசுப் பள்ளியில் பயின்ற பல மாணவர்கள் வெளிநாட்டிலும் வெளி மாநிலங்களிலும் ஐ.டி துறைகளில் உயர்பதவியில் இருக்கின்றனர். நமது பாடத்திட்டத்தை குறை கூறுவது நம்முடைய ஆசிரியர்களை, மாணவர்களை குறை கூறுவதற்குச் சமம். இதற்கு எந்த விதத்திலும் திராவிட அரசும், நமது முதல்வரும் இடம் கொடுக்க மாட்டார்கள். இந்தியாவிலேயே சிறந்த கல்வித் திட்டம் தமிழக கல்வி திட்டம்தான். உலகின் தலைசிறந்த மருத்துவர்களும் தமிழ்நாட்டில் படித்தவர்கள்தான். இதனை பொறுத்துக் கொள்ள முடியாத ஒரு சிலர் வயிற்றெரிச்சல் பிடித்துக் கொண்டு, நமது பாடத்திட்டத்தை குறை கூறி வருகின்றனர்!” என காட்டமாக பதிலடி கொடுத்திருக்கிறார்.
ஏற்கெனவே செப்டம்பர் 1-ம் தேதி நடந்த தனியார் நிகழ்ச்சியிலும் ஆளுநர் ரவி, தமிழகப் பாடத்திட்டத்தை குறைசொல்லியிருந்தார். அதற்கு அப்பாவு, அன்பில் மகேஷ் போன்ற தி.மு.க தலைவர்களும், காங்கிரஸ் செல்வப்பெருந்தகை, ம.ம.க ஜவாஹிருல்லாஹ், ம.தி.மு.க துரை வைகோ உள்ளிட்ட தி.மு.க கூட்டணிக் கட்சித் தலைவர்கள் காட்டமான கண்டன அறிக்கை வெளியிட்டிருந்தது குறிப்பிடத்தக்கது.
