பசி ஓர் உலக மொழி. மனிதன் தோன்றிய நாள்முதல் அவனுடனேயே ஒட்டிக்கொண்டிருக்கும் இந்தப் பசியால் மட்டும் ஆண்டுக்கு 9 மில்லியன் பேர் உயிரிழக்கின்றனர் என்று தரவுகள் கூறுகின்றன. இதனால், நாள்தோறும் 25,000 பேர் உயிரிழக்கின்றனர். அதில், 10,000-க்கும் மேற்பட்டோர் குழந்தைகள். மேலும், 2023-ம் ஆண்டின் உணவுப் பாதுகாப்பு மற்றும் ஊட்டச்சத்துக்கான உலக அறிக்கையின்படி, 2022-ல் மட்டும் 691 முதல் 783 மில்லியன் மக்கள் பட்டினியை எதிர்கொண்டிருக்கின்றனர்.
பசியின் கொடுமை இவ்வாறு நாளுக்கு நாள் புதிய உச்சத்தை நோக்கிச் சென்று கொண்டிருக்கும் வேளையில், நமீபியா (Namibia) நாட்டு அரசு கடும் வறட்சியால் பாதிக்கப்பட்டிருக்கும் தங்களின் மக்களுக்கு உணவளிக்க 700-க்கும் மேற்பட்ட வனவிலங்குகளை வேட்டையாட முடிவெடுத்திருக்கிறது. முன்னதாக, நமீபியாவின் மக்கள்தொகையில் கிட்டத்தட்டப் பாதிப் பேர் உணவுப் பாதுகாப்பின்மையால் பாதிக்கப்பட்டிருந்தாகக் கடந்த மாதம் ஐக்கிய நாடுகள் அமைப்பு அறிக்கை ஒன்றை வெளியிட்டிருந்தது.
