கிருஷ்ணகிரி : கிருஷ்ணகிரி பள்ளி மாணவி வன்கொடுமை விவகாரத்தில் கைது செய்யப்பட்ட பயிற்சியாளா் சிவராமன் உயிரிழந்த நிலையில், அவரது தந்தை சாலை விபத்தில் பலியானதாக பேலீசார் தெரிவித்துள்ளனர்.
கிருஷ்ணகிரி அருகே பள்ளி மாணவி பாலியல் வன்கொடுமை சம்பவத்தில் கைது செய்யப்பட்ட சிவராமன், தற்கொலைக்கு முயன்றதில் உடல் நலம் பாதிக்கப்பட்டு சேலம் அரசு மருத்துவக் கல்லூரி மருத்துவமனையில் சிகிச்சைக்காக அனுமதிக்கப்பட்டார். அங்கு அவர் சிகிச்சை பலனின்றி வெள்ளிக்கிழமை அதிகாலை உயிரிழந்தார்.
இந்த நிலையில்,சிவராமனின் தந்தை அசோக் குமார் (61), சாலை விபத்தில் பலியானது தெரிய வந்துள்ளது.
கிருஷ்ணகிரி மாவட்டம், காவேரிபட்டிணம் , நடேசன் திருமண மண்டபம் அருகே இருசக்கர வாகனத்தில் அவர் சென்று கொண்டிருந்த போது நிலை தடுமாறி கீழே விழுந்ததில் பலத்த காயமடைந்த அவர் உயிரிழந்ததாக போலீசார் தெரிவிக்கின்றனர்.
அசோக் குமாரின் உடலை கைப்பற்றிய போலீசார், உடற்கூறாய்வுக்காக கிருஷ்ணகிரி அரசு மருத்துவக் கல்லூரி மருத்துவமனைக்கு அனுப்பி வைத்தனர்.
இந்த விபத்து குறித்து காவேரிப்பட்டிணம் போலீசார் விசாரணை செய்து வருகின்றனர்.
பாலியல் வன்கொடுமை சம்பவத்தில் கைது செய்யப்பட்ட சிவராமன் உயிரிழந்த நிலையில், அவரது தந்தையும் விபத்தில் உயிரிழந்தது பரபரப்பை ஏற்படுத்தி உள்ளது.
