பென்னாகரம்: காவிரி ஆற்றில் நீர்வரத்து வினாடிக்கு 8,000 கன அடியாக குறைந்துள்ளதால், ஒகேனக்கல்லில் பரிசல் இயக்க மாவட்ட நிர்வாகம் அனுமதி அளித்துள்ளது.
கேரளம் மற்றும் கர்நாடக மாநிலங்களின் காவிரி நீர் பிடிப்பு பகுதியில் கடந்த சில நாள்களாக கனமழை பெய்ததன் காரணமாக கபினி மற்றும் கிருஷ்ணராஜ சாகர் அணைகளுக்கு வரும் நீரின் வரத்து அதிகரித்து இருந்தது. இதனால் காவிரி ஆற்றில் வினாடிக்கு 2.30 லட்சம் கனஅடி வீதம் உபரி நீர் காவிரி ஆற்றின் வெளியேற்றப்பட்டது.
தொடர் நீர்வரத்து அதிகரிப்பின் காரணமாக ஒகேனக்கல்லில் வெள்ளப்பெருக்கு ஏற்பட்ட நிலையில் கடந்த 23 நாள்களாக தருமபுரி மாவட்ட நிர்வாகமானது பொதுமக்கள் மற்றும் சுற்றுலாப் பயணிகள் ஒகேனக்கல் அருவிகளில் குளிப்பதற்கும் காவிரி ஆற்றில் பரிசல் பயணம் மேற்கொள்வதற்கும் தடை விதித்து வந்தது.
தற்போது காவிரி ஆற்றில் வரும் நீரின் அளவு தொடர்ந்து குறைந்து, வியாழக்கிழமை நிலவரப்படி வினாடிக்கு 8,000 கன அடியாக வந்து கொண்டிருக்கிறது.
