பராம்பரியம் மற்றும் பக்தியுடன் கூடிய அம்பானி குடும்பம், அனந்த் அம்பானி – ராதிகா மெர்ச்சண்ட் திருமணத்திற்கு தெய்வீக ஆசீர்வாதத்தை பெறும் வகையில், அவர்களின் பிரமாண்ட வீடான ஆண்டிலியாவில் சிவசக்தி பூஜையை நடத்தினர்.
திருமணத்திற்கு முந்தைய சடங்குகளான இந்த பூஜையில், முகேஷ் அம்பானியின் நெருங்கிய குடும்ப உறுப்பினர்கள், கிரிக்கெட் வீரர் எம்.எஸ்.தோனி, நடிகர் ரன்வீர் சிங், நடிகை ஜான்வி கபூர் மற்றும் அனன்யா பாண்டியா உள்பட பல பிரபலங்கள் கலந்து கொண்டனர்.
அம்பானி குடும்பத்தில் ஆழமாக வேரூன்றிய ஆன்மீக அடையாளமாக விளங்கும் ஆண்டிலியாவில் உள்ள அலங்கரிக்கப்பட்ட கோயிலில் விழா நடைபெற்றது. மணமகனின் பெற்றோர்களான முகேஷ் அம்பானி – நீடா அம்பானி ஆகியோர் சடங்குகளை வழிநடத்தி, புனித சிவலிங்கத்திற்கு பாலாபிஷேகம் செய்து வழிபட்டனர். அனந்த் அம்பானி – ராதிகா மெர்ச்சண்ட் தம்பதியினருக்கு செழிப்பையும், நல்லிணக்கத்தையும் பெறும் வகையில் வேண்டிக் கொள்ளப்பட்டது.
இதையும் படிங்க: அனந்த் அம்பானி – ராதிகா மெர்ச்சண்ட் திருமணம் விழா – 3 நாட்கள் என்னென்ன கொண்டாட்டங்கள்! முழு விவரம்
பாலாபிஷேகத்தை தொடர்ந்து, குடும்பத்தினர் ஆரத்தி எடுத்து வழிபட்டனர். ஆரத்தி முடிந்ததும் அம்பானி குடும்பத்தினரும், அவர்களது விருந்தினர்களும் ‘ஹர ஹர மகாதேவ்’ என சிவபெருமானுக்கான சக்திவாய்ந்த மந்திரத்தை ஆண்டிலியாவின் உச்சி வரை கேட்கும் வகையில் முழங்கினர்.
இந்த விழாவின்போது, இசையமைப்பாளரும், பாடகருமான அமித் திரிவேதி நேரலை நிகழ்ச்சி நடத்தினார். மேலும் கேதார்நாத் திரைப்படத்தில் அவர் இயற்றிய ’நமோ நமோ’ பாடலைப் பாடி பக்தி பரவசமூட்டினார்.
.
