டெபாசிட் இழந்த நாம் தமிழர் அபிநயா.. 1 லட்சம் ஓட்டு வித்தியாசத்தில் தோல்வி

சென்னை: விக்கிரவாண்டி சட்டசபை இடைத்தேர்தலில் நாம் தமிழர் கட்சியின் அபிநயா எத்தனை வாக்குகளில் தோல்வி அடைந்தார் என்பது தெரியுமா? அபிநயாவின் டெபாசிட் தொகையும் பறி போனது.

விக்கிரவாண்டி இடைத்தேர்தலில் திமுகவின் சார்பில் அன்னியூர் சிவாவும் பாமக சார்பில் சி.அன்புமணியும் நாம் தமிழர் கட்சியின் சார்பில் அபிநயாவும் போட்டியிட்டனர். இந்த நிலையில் அதிமுகவும், தேமுதிகவும் இந்த தேர்தலை புறக்கணித்தனர். அது போல் பாஜகவும் கூட்டணிக் கட்சியான பாமகவுக்கு அந்த தொகுதியை கொடுத்துவிட்டது.

இந்த நிலையில் கடந்த 10ஆம் தேதி விக்கிரவாண்டி தொகுதிக்கு இடைத்தேர்தல் நடத்தப்பட்டது. இதில் 82 சதவீத வாக்குகள் பதிவாகியிருந்தன. அதிமுக தேர்தலை புறக்கணிப்பதாக சொல்லப்பட்ட நிலையில் அதிமுகவினர் தேர்தலை புறக்கணிக்கவில்லை என்பது வாக்கு சதவீதத்தை வைத்து பார்த்தாலே தெரிகிறது.

இந்த நிலையில் விக்கிரவாண்டி இடைத்தேர்தலில் பதிவான வாக்குகள் இன்று காலை 8 மணி முதல் எண்ணப்பட்டது. வாக்கு எண்ணிக்கை தொடங்கியதும் முதலில் தபால் வாக்குகள் எண்ணும் பணி நடந்தது. அதில் முதல் வாக்கே கையெழுத்து இல்லாததால் செல்லாவாக்காக போய்விட்டது.

தபால் வாக்குகள் முடிவில் திமுக வேட்பாளர் அன்னியூர் சிவா 130 வாக்குகளையும் பாமக வேட்பாளர் 10 வாக்குகளையும் நாம் தமிழர் கட்சி வேட்பாளர் அபிநயா இரு வாக்குகளையும் பெற்றார். தொடர்ந்து மின்னணு வாக்கு இயந்திரத்தில் பதிவான வாக்குகள் எண்ணப்பட்டன.

மொத்தம் 20 சுற்றுகளாக வாக்குகள் எண்ணப்பட்டதில் முதல் சுற்று முதலே திமுக வேட்பாளர் அன்னியூர் சிவா முன்னிலை வகித்து வந்தார். இந்த நிலையில் இறுதி சுற்றின் முடிவில் அன்னியூர் சிவா 1,24,053 வாக்குகளை பெற்று வென்றார். பாமக வேட்பாளர் சி.அன்புமணி 56,296 வாக்குகளையும் பெற்று இரண்டாவது இடத்தை பிடித்தார்.

நாம் தமிழர் கட்சி வேட்பாளர் டாக்டர் அபிநயா 10,602 வாக்குகளை பெற்றார். நோட்டாவில் 859 வாக்குகள் பதிவானது. 67,757 வாக்குகள் வித்தியாசத்தில் திமுக வேட்பாளர் அன்னியூர் சிவா வென்றார். தேர்தல் ஆணையம் வெளியிட்ட தகவல்களின்படி
அபிநயா தோற்ற வாக்கு வித்தியாசம் 113451 ஆகும்.

விக்கிரவாண்டி இடைத்தேர்தல் வெற்றி குறித்து திமுக தலைவரும், தமிழக முதல்வருமான மு.க.ஸ்டாலின் அறிக்கை வெளியிட்டார். அதில், “விக்கிரவாண்டி தொகுதி இடைத்தேர்தலில் திமுகவுக்கு மகத்தான, மாபெரும் வெற்றியை வழங்கிய விக்கிரவாண்டி வாக்காளப் பெருமக்கள் அனைவருக்கும் எனது மனமார்ந்த நன்றியைத் தெரிவித்துக் கொள்கிறேன்.

இதேநேரத்தில் இந்தியா முழுமைக்கும் பல்வேறு மாநிலங்களில் நடைபெற்ற 13 சட்டமன்றத் தொகுதிகளுக்கான இடைத்தேர்தலில் இண்டியா கூட்டணி கட்சிகள் 11 இடங்களில் முன்னணியில் இருக்கிறது. பாஜக தோல்வியைத் தழுவி இருக்கிறது. மக்களவைத் தேர்தலில் ஆட்சி அமைக்கும் பெரும்பான்மையைப் பெறாத கட்சி தான் பாஜக. இறங்கி வந்து சில கட்சிகளின் தயவால் மத்தியில் ஆட்சி அமைத்துள்ளது பாஜக.

அத்தகைய தோல்வி முகமே பாஜகவுக்கு இந்த இடைத்தேர்தலிலும் தொடர்கிறது.தோல்விகளில் இருந்து பாஜக பாடம் கற்றுக் கொள்ளவேண்டும். மாநில உணர்வுகளை மதிக்காமல் ஆட்சியையும் கட்சியையும் நடத்த முடியாது என்பதை பாஜக இனியாவது உணர வேண்டும். தமிழகத்தைப் பொறுத்தவரை 2019-ம் ஆண்டு முதல் திமுக தலைமையிலான இண்டியா கூட்டணியின் வெற்றி தொடர்கிறது. திமுக வரலாற்றின் பொன்னெழுத்துக்களால் பொறிக்கத்தக்க வெற்றியாக விக்கிரவாண்டி இடைத்தேர்தல் வெற்றியும் அமைந்துள்ளது.

இந்த வெற்றியானது எங்களுக்கு மாபெரும் உற்சாகத்தையும், எழுச்சியையும், அதேசமயத்தில் கூடுதல் பொறுப்பையும் கொடுத்திருக்கிறது. நாள்தோறும் நல்ல பல திட்டங்கள் என சாதனைகள் செய்து வரும் திமுக அரசின் சாதனைகளுக்கு மகுடம் சூட்டுவதாக, சாதனை வெற்றியாக இது அமைந்துள்ளது. நாங்கள் எங்களது சாதனைப் பயணத்தையும், வெற்றிப் பயணத்தையும் தொடர்கிறோம்.மக்களோடு இருக்கிறோம். மக்கள் எங்களோடு இருக்கிறார்கள்.” என்று முதல்வர் ஸ்டாலின் கூறியுள்ளார்.