20 சுற்றுகளாக நடைபெறும் வாக்கு எண்ணிக்கை: விக்கிரவாண்டி சட்டப்பேரவைத் தொகுதி வாக்கு எண்ணிக்கை சனிக்கிழமை காலை 8 மணிக்குத் தொடங்கியது. முன்னதாக மாவட்டத் தேர்தல் அலுவலரும், ஆட்சியருமான சி.பழனி, தேர்தல் நடத்தும் அலுவலர் மு.சந்திரசேகர் தலைமையில், அரசியல் கட்சிகளின் வேட்பாளர்கள், அவர்களின் முகவர்கள் முன்னிலையில் பாதுகாப்பு அறைக்கு வைக்கப்பட்ட சீல் அகற்றப்பட்டு, அறை திறக்கப்பட்டது. தொடர்ந்து வாக்குப்பதிவு இயந்திரங்கள் வாக்கு எண்ணிக்கை பகுதிக்கு கொண்டு வரப்பட்டன. முன்னதாக விக்கிரவாண்டி வட்டாட்சியரகத்தில் பாதுகாப்பு அறையில் வைக்கப்பட்டிருந்த அஞ்சல் வாக்குகள் கொண்ட பெட்டி எடுக்கப்பட்டு, வாக்கு எண்ணிக்கை மையத்துக்கு கொண்டு வரப்பட்டன.
சனிக்கிழமை காலை 8 மணிக்கு முதலில் அஞ்சல் வாக்குகளைக் கொண்ட பெட்டியின் சீல் உடைக்கப்பட்டு, வாக்குகள் பிரிக்கப்பட்டு, 50 எண்ணிக்கை கொண்டு கட்டுகளாக கட்டப்பட்டு பின்னர் எண்ணப்பட்டு வருகின்றன. இந்த பணிகள் முடிந்த பின்னர், மின்னணு வாக்குப்பதிவு இயந்திரங்களில் பதிவான வாக்குகளை எண்ணும் பணி தொடங்கி நடைபெறும்.
இதற்காக வாக்கு எண்ணிக்கை மையத்தில் 14 மேஜைகள் அமைக்கப்பட்டுள்ளன. மேஜை ஒன்றுக்கு ஒரு மேற்பார்வையாளர், ஒரு உதவியாளர், ஒரு நுண் பார்வையாளர் பணியில் இருப்பர். அஞ்சல் வாக்கு எண்ணிக்கைக்கு 2 மேஜைகள்அமைக்கப்பட்டுள்ளன. பாதுகாப்பு அறையிலிருந்து வாக்குப்பதிவு இயந்திரங்களைக் கொண்டு செல்லும் பணிக்கு கிராம உதவியாளர்கள், இதர பணிகளுக்காக வட்டாட்சியர்கள், துணை வட்டாட்சியர்கள், இதரப் பணியாளர்கள் என மொத்தமாக150 பேர் வாக்கு எண்ணிக்கைப் பணியில் ஈடுபடுத்தப்பட்டுள்ளனர்.
பாதுகாப்புப் பணியில் 1,200 போலீஸார்:வாக்கு எண்ணிக்கை நடைபெறும் பனையபுரம் அரசு மேல்நிலைப்பள்ளியில் மின்னணு வாக்குப்பதிவு இயந்திரங்கள் வைக்கப்பட்டுள்ள பாதுகாப்பு அறை உள்ளிட்ட பகுதிகளில் மூன்றடுக்குப் பாதுகாப்புடன்சுழற்சி முறையில் 24 மணி நேரமும் பணியில் இருக்கும் வகையில் 150 போலீஸார் பாதுகாப்புப் பணியில் ஈடுபட்டுள்ளனர்.
இதைத்தவிர பனையபுரம் அரசு மேல்நிலைப் பள்ளியின் வெளி வளாகப் பகுதி, சாலைகள், பிற இடங்கள், விக்கிரவாண்டி நகரப் பகுதிகளில், ரோந்துப் பணிகளில் என பல்வேறு இடங்களில் பாதுகாப்புப் பணியில் 1200 போலீீஸார் ஈடுபட்டுள்ளனர்.
மாவட்ட எஸ்.பி. தீபக் சிவா தலைமையில், 4 ஏ.டி.எஸ்.பி.க்கள், 7 டி.எஸ்.பிக்கள், 28 காவல் ஆய்வாளர்கள், தமிழ்நாடு சிறப்புக் காவல்படையைச் சேர்ந்த 320 வீரர்கள், மத்தியத் தொழில்பாதுகாப்புப் படையைச் சேர்ந்த 16 வீரர்கள், பிற காவலர்கள் என மொத்தமாக 1,200 பேர் பாதுகாப்புப் பணியில் சனிக்கிழமை அதிகாலை முதல் ஈடுபட்டனர். இதைத் தவிர ரோந்துப் பணியிலும் காவல்துறையினர் ஈடுபட்டுள்ளனர்.
20 சுற்றுகளாக வாக்கு எண்ணிக்கை நடைபெறும் நிலையில், பிற்பகல் 12 மணிக்குள் வெற்றி நிலவரம் தெரிய வரும் என எதிர்பார்க்கப்படுகிறது.
