ரிலையன்ஸ் இண்டஸ்ட்ரீஸ் நிறுவன தலைவர் முகேஷ் அம்பானியின் இளைய மகன் அனந்த் அம்பானி மற்றும் தொழிலதிபர் வீரேன் மெர்ச்சன்ட்டின் மகள் ராதிகா மெர்ச்சன்ட் ஆகியோரின் திருமணம் இன்று இரவு நடைபெறுகிறது. இதில் பல உலக தலைவர்கள், உலக பிரபலங்கள், முதலீட்டாளர்கள், கல்வியாளர்கள், பாலிவுட் பிரபலங்கள் என பல துறை சார்ந்த பிரபலங்கள் கலந்துகொள்ள உள்ளனர்.
அம்பானி சாம்ராஜ்ஜியத்தின் ‘ஃபேமிலி ட்ரீ’:
திருபாய் அம்பானி & கோகிலாபென் அம்பானி: ரிலையன்ஸ் இண்டஸ்ட்ரீஸ் லிமிடெட் நிறுவனர் மற்றும் தலைவர் திருபாய் அம்பானி, 1955-ல் கோகிலாபென் அம்பானியை திருமணம் செய்து கொண்டார். இந்த தம்பதியருக்கு முகேஷ் அம்பானி, அனில் அம்பானி, நினா அம்பானி மற்றும் திப்தி அம்பானி ஆகிய நான்கு குழந்தைகள் பிறந்தனர். 1957-ல், திருபாய் அம்பானி மும்பையில் நூல் வர்த்தகத் தொழிலைத் தொடங்கினார். அதன்பின்னர், ரிலையன்ஸ் இண்டஸ்ட்ரீஸ் லிமிடெட் நிறுவனத்தை 1996-ல் தனது மகன்கள் முகேஷ் மற்றும் அனில் ஆகியோரிடம் ஒப்படைக்க முடிவு செய்தார். ஜூலை 6, 2002 அன்று, திருபாய் அம்பானி காலமானார்.
முகேஷ் அம்பானி & நிதா அம்பானி: முகேஷ் அம்பானி ரிலையன்ஸ் இண்டஸ்ட்ரீஸ் லிமிடெட் நிறுவனத்தின் தலைவர் மற்றும் நிர்வாக இயக்குனர் ஆவார். அவர் 1985-ல் நீடா அம்பானியை மணந்தார். தம்பதியருக்கு இஷா அம்பானி என்ற மகளும், ஆகாஷ் அம்பானி மற்றும் அனந்த் அம்பானி ஆகிய இரண்டு மகன்களும் உள்ளனர்.
ஆகாஷ் அம்பானி & ஷ்லோகா மேத்தா: ஆகாஷ் அம்பானி ரிலையன்ஸ் ஜியோ இன்ஃபோகாமின் தலைவராக பணியாற்றுகிறார். அவர் 2019-ல் தொழில் அதிபர் ரஸ்ஸல் மேத்தா மற்றும் மோனா மேத்தா ஆகியோரின் மகள் ஷ்லோகா மேத்தாவை மணந்தார். இந்த தம்பதியருக்கு பிரித்வி மற்றும் வேதா என இரண்டு குழந்தைகள் உள்ளனர்.
இஷா அம்பானி & ஆனந்த் பிரமல்: இஷா அம்பானி, ரிலையன்ஸ் ரீடெய்ல் இண்டஸ்ட்ரீஸ் லிமிடெட் வாரியத்தின் உறுப்பினராகவும், ரிலையன்ஸ் ஜியோ இன்ஃபோகாம் லிமிடெட், ஜியோ பைனான்சியல் சர்வீசஸ் லிமிடெட் மற்றும் ரிலையன்ஸ் ஃபவுண்டேஷன் (RF), திருபாய் அம்பானி சர்வதேச பள்ளி, ரிலையன்ஸ் அறக்கட்டளை கல்வி நிறுவனத்தின் நிர்வாகத் தலைமைக் குழுக்களின் ஒரு பகுதியாக உள்ளார். இஷா அம்பானி பிரமல் குழுமத்தின் நிர்வாக இயக்குனரான ஆனந்த் பிரமாலை 2018ஆம் ஆண்டில் திருமணம் செய்து கொண்டார். இந்த தம்பதிக்கு கிருஷ்ணா மற்றும் ஆதியா ஆகிய இரட்டை குழந்தைகள் உள்ளனர்.
அனந்த் அம்பானி & ராதிகா மெர்ச்சன்ட்: இந்த தருணத்தின் ஜோடி.. அனந்த் அம்பானி மற்றும் ராதிகா மெர்ச்சன்ட், கடந்தாண்டு நிச்சயதார்த்தம் செய்து கொண்டனர். இந்த ஜோடியின் திருமணத்திற்கு முந்தைய விழாக்கள் பல விதமாக பல துறை பிரபலங்கள் சூழ பிரம்மாண்டமாக நடைபெற்றன. மாமேரு, கோல் தானா போன்ற பாரம்பரிய குஜராத்தி விழாக்களும் இவற்றோடு நடைபெற்றன.
அனில் அம்பானி & டினா அம்பானி: அனில் அம்பானி, ரிலையன்ஸ் ஏடிஏ குழுமத்தின் தலைவர், முன்னாள் பாலிவுட் நடிகை டினா முனிம்-ஐ 1991-ல் திருமணம் செய்து கொண்டார். டினா முனிம், ரிலையன்ஸ் குழுமம், மும்பையில் உள்ள கோகிலாபென் திருபாய் அம்பானி மருத்துவமனை, ஹார்மனி ஃபார் சில்வர்ஸ் அறக்கட்டளை மற்றும் ஹார்மனி கலை அறக்கட்டளை ஆகியவற்றின் தலைவராக உள்ளார். இவர்களுக்கு ஜெய் அன்மோல் அம்பானி மற்றும் ஜெய் அன்ஷுல் அம்பானி என இரு மகன்கள் உள்ளனர்.
Also Read |
குழந்தை பருவ தோழியை கரம்பிடிக்கும் அனந்த் அம்பானி… காதல் கதையை வெளிபடுத்திய புகைப்படம்!
நினா கோத்தாரி: அனில் மற்றும் முகேஷின் சகோதரி நினா கோத்தாரி சுகர்ஸ் அண்ட் கெமிக்கல்ஸ் லிமிடெட் நிறுவனத்தின் தலைவராவதன் மூலம் தனது சொந்த இடத்தை செதுக்கினார். அவரது கணவர், தொழிலதிபர் பத்ராஷ்யம் கோத்தாரி, 2015ஆம் ஆண்டில் புற்றுநோயால் இறந்தார். அவருக்கு அர்ஜுன் மற்றும் நயன்தாரா கோத்தாரி ஆகிய மகனும், மகளும் உள்ளனர்.
திப்தி அம்பானி: கடைசி தங்கையான திப்தி அம்பானி, VM சல்கோகர் குழும நிறுவனங்களை நடத்தும் தத்தராஜ் சல்கோகரை மணந்தார் என்று பல ஊடக அறிக்கைகள் கூறுகின்றன. இந்த கார்ப்பரேஷன் முதன்மையாக இரும்பு தாது, நிலக்கரி மற்றும் காற்றாலை ஆற்றல் ஆகியவற்றைக் கையாள்கிறது. இவர்களுக்கு இஷிகா சல்கோகர் என்ற மகளும், விக்ரம் சல்கோகர் என்ற மகனும் உள்ளனர்.
.
