அடுத்தடுத்து சிக்கல்… பெண் கடத்தல் வழக்கில் ரேவண்ணா மனு மீது இன்று விசாரணை

முன்னாள் பிரதமர் தேவகவுடாவின் பேரனும், நாடாளுமன்ற உறுப்பினருமான பிரஜ்வல் ரேவண்ணா தொடர்பான ஆபாச வீடியோ வெளியாகி பெரும் பரபரப்பை ஏற்படுத்தியது.

இதனை தொடர்ந்து, அவரது வீட்டில் பணியாற்றிய ஊழியரின் 16 வயது மகளுக்கு பாலியல் தொல்லை கொடுத்ததாக பிரஜ்வல் மற்றும் அவரது தந்தையான முன்னாள் அமைச்சர் எச்.டி.ரேவண்ணா மீது காவல்நிலையத்தில் வழக்குப் பதிவு செய்யப்பட்டது.
இந்த புகார் தொடர்பாக பெங்களூரு மாவட்ட நீதிமன்றத்தில் ரேவண்ணா முன்ஜாமின் கோரி மனு தாக்கல் செய்தார்.

அப்போது, பிணையில் விடுவிக்கக் கூடிய பிரிவில் வழக்கு பதியப்பட்டுள்ள நிலையில், முன்ஜாமினுக்கான அவசியம் என்ன என்று நீதிமன்றம் கேள்வி எழுப்பியதால், தனது மனுவை ரேவண்ணா திரும்ப பெற்றுக் கொண்டார். இதனை தொடர்ந்து, பெண் ஒருவரை கடத்திச் சென்றதாக, ரேவண்ணா மீது மைசூரு கே.ஆர்.நகர் காவல்நிலையத்தில் மற்றொரு வழக்கு பதிவு செய்யப்பட்டது. கடத்தப்பட்டதாக கூறப்படும் பெண்ணின் மகன் அளித்த புகாரின் படி ரேவண்ணா, அவரது உறவினர் சுரேஷ்பாபு ஆகியோர் மீது வழக்குப்பதிவு செய்த போலீசார், சுரேஷ்பாபுவை கைது செய்தனர்.

இந்நிலையில், இப்புதிய வழக்கில் முன்ஜாமின் கோரி பெங்களூரு மாவட்ட நீதிமன்றத்தில் ரேவண்ணா தாக்கல் செய்த மனு இன்று விசாரணைக்கு வருகிறது..