கர்நாடக மாநிலம் ஷிவமோகா தொகுதியை கைப்பற்றப்போவது யார் என்கிற எதிர்பார்ப்பு எழுந்துள்ளது. முன்னாள் முதலமைச்சர்கள் எடியூரப்பா மற்றும் பங்காரப்பாவின் வாரிசுகள் களத்தில் நேரடியாக மோதும் நிலையில், பாஜகவில் சீட் கிடைக்காத அதிருப்தியில் முன்னாள் துணை முதலமைச்சர் ஈஸ்வரப்பாவும் போட்டியிடுவதால் மும்முனை போட்டி நிலவுகிறது.
கர்நாடகா மாநிலத்தில் உள்ள 28 தொகுதிகளில் பெங்களூரு உள்ளிட்ட 14 தொகுதிகளுக்கு கடந்த 26ம்தேதி மக்களவைத் தேர்தல் நடைபெற்றது. எஞ்சிய 14 தொகுதிகளுக்கு வரும் 7ம் தேதி வாக்குப்பதிவு நடைபெற உள்ளது. இந்த 14 தொகுதிகளில் வேட்பாளர்கள் பலரும் களத்தில் இருந்தாலும், ஷிவ்மோகா தொகுதி கூடுதல் கவனம் பெற்றுள்ளது. இதற்கு காரணம் அங்கு போட்டியிடும் வேட்பாளர்கள் தான். ஷிவமொகா தொகுதியின் தற்போதைய எம்பியும், முன்னாள் முதலமைச்சருமான எடியூரப்பாவின் மகன் ராகவேந்திரா, பாஜக சார்பில் மீண்டும் போட்டியிடும் நிலையில், அவரை எதிர்த்து காங்கிரஸ் சார்பில் முன்னாள் முதலமைச்சர் பங்காரப்பாவின் மகளும், நடிகர் ஷிவ்ராஜ் குமாரின் மனைவியுமான கீதா களமிறங்கி உள்ளார்.
இதையும் படிங்க: 10 மாநிலங்கள்.. 95 தொகுதிகள்.. 3வது கட்ட மக்களவை தேர்தல் பரப்புரை இன்றுடன் ஒய்கிறது
இவர்கள் இடையே கடும் போட்டி நிலவும் என எதிர்பார்க்கப்பட்ட நிலையில், பாஜகவில் சீட் கிடைக்காத விரக்தியில் முன்னாள் துணை முதலமைச்சர் ஈஸ்வரப்பா, நாம் தமிழர் கட்சி பயன்படுத்திய விவசாயி சின்னத்தில் சுயேட்சையாக போட்டியிடுவதால் ஷிவமோகா தொகுதி அரசியல் முக்கியத்துவம் வாய்ந்ததாக உள்ளது. இதில் சுவாரஸ்யம் என்ன வென்றால், பாஜகவின் தாமரை சின்னத்தை எதிர்த்து களமிறங்கியுள்ள ஈஸ்வரப்பா, பிரதமர் நரேந்திர மோடியின் படத்துடன் பரப்புரை மேற்கொண்டு வருவதுதான்.
ஷிவமொகா நகர் பகுதியில் பாஜக வேட்பாளர் ராகவேந்திரா பரப்புரை மேற்கொண்டார். அவருக்கு பாஜகவினர் உற்சாக வரவேற்பு அளித்தனர். ஷிவமொகாவில் தீவிர பரப்புரை ஆற்றி வரும் ஈஸ்வரப்பா நியூஸ் 18 தொலைக்காட்சிக்கு பிரத்யேக பேட்டி அளித்தார், அதில், பாஜகவை தூய்மைப்படுத்தவே தான் சுயேச்சையாக களம் காண்பதாக கூறினார். தனது மனைவிக்காக தீவிர வாக்கு சேகரிப்பில் ஈடுபட்ட நடிகர் ஷிவ்ராஜ் குமார், கர்நாடகாவில் காங்கிரஸ் அலை வீசுவதாக நியூஸ் 18க்கு தெரிவித்தார். தமிழ்நாட்டில் பாஜக ஒரு இடத்தில் கூட வெல்லாது என்றும் அவர் குறிப்பிட்டார்.
களத்தில் மும்முனை போட்டி நிலவுவதால், ஷிவமொகா தொகுதியை கைப்பற்ற போவது யார் என்கிற கேள்வி வலுவாகவே எழுந்துள்ளது.
உலகம் முதல் உள்ளூர் வரை இன்றைய முக்கிய செய்திகள் (Top Tamil News, Breaking News), அண்மைச் செய்திகள் (Latest Tamil News), அனைத்தையும் நியூஸ்18 தமிழ் (News18Tamil.com) இணையதளத்தில் உடனுக்குடன் அறியலாம். News 18 தமிழ் : வாட்ஸ் அப் சேனலை ஃபாலோ செய்யுங்கள்.
நியூஸ்18 தமிழ்நாடு தொலைக்காட்சியை, ARASU CABLE – 46, TCCL – 57, SCV – 28, VK Digital – 30, SUN DIRECT DTH: 71, TATA PLAY: 1562, D2H: 2977, AIRTEL: 782, DISH TV:2977 ஆகிய அலைவரிசைகளில் காணலாம்…
