குஜராத்தில் நீட் தேர்வில் மோசடி செய்த புகாரில் ஆசிரியர் மற்றும் அவருக்கு உதவிய இருவரை காவல்துறையினர் கைது செய்தனர். அவர்களிடமிருந்து 7 லட்ச ரூபாய் பறிமுதல் செய்யப்பட்டுள்ளது.
நாடு முழுவதும் கடந்த ஞாயிற்றுக்கிழமை இளநிலை மருத்துவப் படிப்புகளுக்கான நீட் நுழைவுத்தேர்வு நடைபெற்றது. இதில், 24 லட்சத்துக்கும் மேற்பட்டோர் பங்கேற்று தேர்வெழுதினர். குஜராத் மாநிலம் கோத்ராவில் அமைக்கப்பட்டிருந்த நீட் தேர்வு மையத்தின் துணை கண்காணிப்பாளர் உதவியுடன் மோசடி நடந்திருப்பது கண்டுபிடிக்கப்பட்டுள்ளது.
கோத்ராவில் உள்ள தனியார் பள்ளியின் இயற்பியல் ஆசிரியர் துஷார் பட், நீட் தேர்வு மைய துணைக் கண்காணிப்பாளராக நியமிக்கப்பட்டிருந்தார் அவர் மாணவர்களுக்கு உதவுவதாகக் கூறி பெற்றோரிடம் பேரம் பேசியியுள்ளார். அதன்படி, தெரியாத கேள்விகளுக்கு விடை எழுதாமல் விட்டுவிட்டுச் செல்லும்படியும், மாணவர்கள் விடைத்தாள்களை ஒப்படைத்த பிறகு விடைகளை பூர்த்தி செய்வதாக உறுதி அளிக்கப்பட்டுள்ளது. இதற்காக 16 மாணவர்களின் பெற்றோரிடம் தலா 6 முதல் 7 லட்ச ரூபாய் வரை பேரம் பேசப்பட்டுள்ளது.
தேர்வு நேரத்தில் பறக்கும்படையினர் தேர்வறையை சோதனை செய்தபோது, துஷார் பட்டின் செல்போனில், 16 மாணவர்களின் தேர்வு எண் உள்ளிட்ட அனைத்து விவரங்களும் இருந்தது கண்டுபிடிக்கப்பட்டது. தொடர்ந்து அவரிடம் விசாரணை நடத்தியதில் மாணவர் ஒருவரிடமிருந்து முன்பணமாக 7 லட்ச ரூபாய் பெற்றதாகவும் தெரிவித்துள்ளார். இதனை தொடர்ந்து துஷார் பட்டையும் அவருக்கு உதவியதாக மேலும் இரண்டு பேரையும் காவல்துறையினர் கைது செய்தனர்.
இதையும் படிக்க:
10th Public Exam Result : இன்று இந்த இணையதளங்களில் தேர்வு முடிவுகள் வெளியீடு
இதேப்போல் நீட் வினாத்தாள் கசிவு விவகாரத்தில் பிகாரில் பெற்றோர், தேர்வு எழுதிய மாணவர்கள் உள்பட 13 பேர் கைது செய்யப்பட்டுள்ளனர். ராஜஸ்தானில் 4 பேர், டெல்லியில் 3 பேர் கைது செய்யப்பட்ட நிலையில், நீட் மோசடி குறித்த செய்திகள் தொடர்ந்து வருகின்றன. கடும் கட்டுப்பாடுகளை விதித்து நடத்தப்படும் நீட் தேர்வில் இத்தனை மோசடிகளா என கேள்வி எழுப்பும் மருத்துவ அமைப்புகள், தேசிய தேர்வு முகமை மறு தேர்வு நடத்த வேண்டும் என வலியுறுத்தியுள்ளன.
.
