பாஜகவுக்கு விழும் பெரிய அடி: லீக்கான சீக்ரெட் சர்வே? அப்போ எல்லாமே பில்டப் தானா?

மக்களவைத் தேர்தலில் எந்தக் கட்சி எத்தனை இடங்களில் வெற்றி பெறும், எந்த கூட்டணி ஆட்சியைப் பிடிக்கும் என்பது குறித்த எதிர்பார்ப்பு மக்கள் மத்தியில் எழுந்துள்ளது. வட இந்திய ஊடகங்கள் பலவற்றில் பாஜகவே மீண்டும் தனிப்பெரும்பான்மையுடன் ஆட்சியைப் பிடிக்கும் என்று கருத்துக் கணிப்பு முடிவுகளை வெளியிட்டு வருகின்றன.

400 இடங்களில் வெல்வோம் என்று மோடி கூறிவரும் நிலையில் அதையே பிரதிபலிக்கும் வகையில் கருத்துக் கணிப்புகள் வெளியாகி வந்தன. ஆனால் களநிலவரம் பாஜகவுக்கு அவ்வளவு சாதகமாக இல்லை என்றும், மிகக் கடுமையான போட்டியை இந்தியா கூட்டணி அளிக்கும் என்றும் அதுமட்டுமல்லாமல் இந்தியா கூட்டணியே ஆட்சியமைக்கும் என்று தெரிவிக்கப்பட்டுள்ளது.

பாஜக சார்பில் சீக்ரெட் சர்வே ஒன்று எடுக்கப்பட்டதாக சொல்கிறார்கள். அந்த ரிப்போர்ட் தான் பாஜகவின் ஆட்சி கனவை கலைக்கும் படி இருந்துள்ளதாம். தென் மாநிலங்கள், வட கிழக்கு மாநிலங்களில் பாஜகவுக்கு முழு எதிர்ப்பு இருப்பதாக கூறப்பட்டுள்ளதாம். கர்நாடகாவில் கூட எதிர்பார்த்த வெற்றி கிடைக்காதாம்.

உத்தரபிரதேசம், குஜராத், மத்திய பிரதேசம், ராஜஸ்தான் ஆகிய மாநிலங்கள் தான் பாஜகவை காப்பாற்ற உள்ள மாநிலங்களாக குறிப்பிடப்பட்டுள்ளது. ஆனாலும் கடந்த முறை பெற்ற இடங்கள் இந்த முறை கிடைக்காது என்றும் அந்த ரிப்போர்ட்டில் குறிப்பிடப்பட்டுள்ளதாக கூறுகின்றனர்.

உதாரணமாக உத்தர பிரதேசத்தில் மொத்தம் உள்ள 80 இடங்களில் பாஜகவுக்கு 56 இடங்களே கிடைக்கும் என்றும், குஜராத்தில் 23 இடங்கள், பீகாரில் 22, மத்திய பிரதேசத்தில் 25 இடங்கள், ராஜஸ்தானில் 14 இடங்கள், மகாராஷ்டிராவில் 20 இடங்கள் பாஜகவுக்கு கிடைக்கும் என்று அந்த சீக்ரெட் சர்வே சொல்கிறதாம்.
தமிழ்நாட்டில் திமுக கூட்டணிக்கு 38 இடங்கள் கிடைக்கும் என்றும், பாஜக கூட்டணிக்கு ஒரு இடம் கிடைக்கும் என்றும் சொல்லப்பட்டுள்ளது.

மொத்தத்தில் பாஜக தனித்து 217 இடங்களிலும் அதன் கூட்டணி வேட்பாளர்கள் 44 இடங்களிலும் வெற்றி பெறுவார்கள் என்று கூறப்பட்டுள்ளது.
காங்கிரஸ் கட்சி தனித்து 135 இடங்களிலும் அதன் கூட்டணிக் கட்சியினர் 145 இடங்களிலும் வெற்றி பெறுவார்கள் என்று தெரிவிக்கப்பட்டுள்ளதாம்.

இந்தியா கூட்டணி 280 இடங்களில் வெற்றி பெறும் என்ற சர்வே முடிவு பாஜகவுக்கு அதிர்ச்சியை ஏற்படுத்தியுள்ளதாம். எனவே தேர்தல் பிரச்சாரத்தை தீவிரப்படுத்தவும், தேர்தல் வியூகங்களை வலுவாக முன்னெடுக்கவும் கட்சியினருக்கு பாஜக தலைமை அறிவுறுத்தியுள்ளதாம்.