தமிழ்நாட்டில் மக்களவைத் தேர்தல் வரும் ஏப்ரல் 19ஆம் தேதி நடைபெறவுள்ளது. திமுக, அதிமுக, பாஜக, நாம் தமிழர் கட்சி என தேர்தலில் நான்கு முனை போட்டி நிலவி வருகிறது. அதிமுக கூட்டணியில் தேமுதிக, எஸ்டிபிஐ, புதிய தமிழகம் அங்கம் வகிக்கின்றன. பாஜக கூட்டணியில் அதிமுகவில் இருந்து பிரிந்த தினகரனின் அமமுக, ஓபிஎஸ்ஸின் அதிமுக தொண்டர்கள் உரிமை மீட்புக் குழு ஆகியவை உள்ளன.
பாஜக கூட்டணியில் ராமநாதபுரம் தொகுதியில் ஓபிஎஸ் சுயேச்சை சின்னத்திலும், தேனி மக்களவைத் தொகுதியில் டிடிவி தினகரன் குக்கர் சின்னத்திலும் களமிறங்கியுள்ளனர். அங்கு அதிமுகவினர் மற்றும் அமமுகவினர் தீவிர பரப்புரையை மேற்கொண்டு வருகிறார்கள்.
இந்த நிலையில் வாடிப்பட்டியில் பரப்புரை மேற்கொண்ட அதிமுக முன்னாள் அமைச்சர் ஆர்.பி.உதயகுமார், “அமமுக வேட்பாளராக உள்ள டிடிவி தினகரன் 15 ஆண்டுகளுக்கும் மேலாக தேனி பக்கமே எட்டிப்பார்க்காதவர். ஜெயலலிதாவால் நடவடிக்கை எடுக்கப்பட்டு கட்சியில் இருந்து 10 ஆண்டுகளுக்கும் மேல் ஒதுக்கி வைக்கப்பட்டவர். ஜெயலலிதா மறைவுக்குப் பின்னரே தமிழ்நாட்டில் தலைகாட்ட ஆரம்பித்தார். ஆர்.கே.நகரில் 20 ரூபாய் நோட்டை காண்பித்து ஏமாற்றி வெற்றிபெற்று அந்த பக்கம் தலைகாட்டாதவர். இதனால் கோவில்பட்டியில் போட்டியிட்ட நிலையில், அந்த மக்களும் அவர் மீது நம்பிக்கை வைக்காமல் தோல்வியடையச் செய்தனர்.
கடைசி புகலிடமாக தேனி மக்களவைத் தொகுதிக்கு வந்துள்ளார். ஆனால், தேனியிலும் மக்கள் அவரை ஏற்றுக்கொள்வதற்கு தயாராக இல்லை. தேனியை டிடிவி தினகரன் சுற்றி சுற்றி வருகிறார். ஆனால், டிடிவி தினகரன் தோல்வி அடைவது உறுதி. அதிமுக வேட்பாளர்தான் வெற்றிபெறுவார்” என்று தெரிவித்தார்.
தொடர்ந்து, “உதயகுமார் ஒரு பபூஃன்.. அவருக்கெல்லாம் பதில் சொல்லத் தேவையில்லை என டிடிவி தினகரன் கூறியுள்ளார். சரி நான் பபூஃன் என்று ஒப்புக்கொள்கிறேன். என்னால் யாருக்கும் எந்த தீங்கும் ஏற்படாது. ஆனால், தினகரன் என்னும் வில்லனால் என்னென்ன தீமைகள் ஏற்படும் என்று தெரியும்.
ஜெயலலிதா இருந்தவரை டிடிவி தினகரனை பார்த்து பயந்தோம் என்பது உண்மைதான். இப்போது நீங்கள் காட்டும் பூச்சாண்டிக்கு புழு கூட பயப்படாது. அதிமுக தொண்டர்கள் தற்போது சுதந்திர காற்றை சுவாசிக்கிறார்கள். உங்களிடம் இருந்து விடுதலை பெற்று எடப்பாடி பழனிசாமி தலைமையில் சுதந்திரமாக இயங்கி வருகிறோம். அப்போது, டிடிவி தினகரன் வீட்டு காவல் நாயாகவும் இருந்துள்ளோம்.. இப்போது சீறும் சிங்கங்களாக விஸ்வரூபம் எடுத்துள்ளோம்” என்று கூறினார்.
ஆக மொத்தத்தில் இன்று வரை மிருகங்களாகவே இருந்துள்ளீர்கள் இருந்து வருகிறீர்கள் மனிதனா எப்போ மாற போறீங்க