​பொன்முடி அமைச்சர் பதவியில் நீடிப்பாரா? – வெயிட்டிங் லிஸ்ட்டில் இன்னொரு வழக்கு நீதிபதி ஆனந்த் வெங்கடேஷ் கையில்..!

சொத்துக் குவிப்பு வழக்கில் 3 ஆண்டுகள் சிறை தண்டனை பெற்றதால் பொன்முடி தனது அமைச்சர் மற்றும் சட்டமன்ற உறுப்பினர் பதவிகளை 2023ஆம் ஆண்டு டிசம்பர் மாதம் இழந்தார். இதனை எதிர்த்த மேல்முறையீட்டு வழக்கில் பொன்முடிக்கு வழங்கப்பட்ட தண்டனை மற்றும் தீர்ப்பை உச்ச நீதிமன்றம் நிறுத்தி வைத்து அதிரடி உத்தரவு பிறப்பித்தது. இதனால் மீண்டும் எம்.எல்.ஏவாக பொன்முடி தொடர்வார் என அறிவிக்கப்பட்டது.

உச்ச நீதிமன்றத்தில் வழக்கு

உச்ச நீதிமன்ற உத்தரவைத் தொடர்ந்து பொன்முடிக்கு பதவிப் பிரமாணம் செய்து வைக்க ஆளுநர் ஆர்.என்.ரவிக்கு முதல்வர் மு.க.ஸ்டாலின் கடிதம் எழுதினார். ஆனால், பொன்முடிக்கு வழக்கின் தீர்ப்பு நிறுத்தி வைக்கப்பட்டுள்ளதே தவிர அவர் நிரபராதி என தீர்ப்பு வரவில்லை எனக் குறிப்பிட்ட ஆளுநர், பதவிப் பிரமாணம் செய்து வைக்க மறுத்தார். இதனால் அதிருப்தி அடைந்து ஆளுநருக்கு எதிராக உச்ச நீதிமன்றத்தில் தமிழக அரசு வழக்கு தொடர்ந்தது.https://navbharattimes.indiatimes.com/dmp_orion.cms?msid=108779579&sec=state-news&secmsid=48069549&wapCode=tamil&apikey=tamilweba5ec97054033e061&rvMsid=97582233&isXpVdo=tml_xp&isAmp=false

பொன்முடிக்கு பதவிப் பிரமாணம்

இவ்வழக்கை விசாரித்த உச்ச நீதிமன்றம், பொன்முடிக்கு பதவிப் பிரமாணம் செய்து வைக்க வேண்டும் என்றும் இல்லை எனில் நீதிமன்றமே உத்தரவுகளை பிறப்பிக்க நேரிடும் எனவும் ஆளுநருக்கு எச்சரிக்கை விடுத்தது. இதனால் பின்வாங்கிய ஆளுநர், உச்ச நீதிமன்றத்தின் தனது செயலுக்கு வருத்தம் தெரிவித்தார். இதனைத் தொடர்ந்து பொன்முடிக்கு அமைச்சராக பதவிப் பிரமாணம் செய்து வைத்தார்.

​அமைச்சர் பதவி நீடிக்குமா?

பொன்முடிக்கு மீண்டும் உயர்கல்வித் துறை ஒதுக்கீடு செய்யப்பட்டுள்ள நிலையில், அவர் வழக்கமான அமைச்சர் பணிகளை மேற்கொள்ள ஆரம்பித்துள்ளார். இதனால் பொன்முடி மற்றும் அவரது தரப்பு ஆதரவாளர்கள் மகிழ்ச்சியில் உள்ளனர். ஆனால், பொன்முடி அமைச்சர் பதவியில் நீடிப்பது தொடர்பாக இன்னொரு சிக்கல் உள்ளதாக கூறப்படுகிறது. இதுதொடர்பாக மற்றொரு வழக்கை சுட்டிக்காட்டுகிறார்கள் சட்ட வட்டாரங்களில்.

இன்னொரு சொத்துக் குவிப்பு வழக்கு

பொன்முடிக்கு 3 ஆண்டுகள் சிறை தண்டனை விதிக்கப்பட்ட வழக்கு 2006 – 2011 சமயத்தில் அமைச்சராக இருந்தபோது தொடரப்பட்ட சொத்துக் குவிப்பு விவகாரம் தொடர்பானது. அதே சமயம் பொன்முடி மீது 1996 – 2001 வரை அமைச்சராக இருந்தபோது சொத்துகளை குவித்ததாக 2001 அதிமுக ஆட்சியில் தொடரப்பட்ட இன்னொரு சொத்துக் குவிப்பு வழக்கு உள்ளது.

நீதிபதி ஆனந்த் வெங்கடேஷ் அதிரடி

20 வருடங்களுக்கு மேல் நிலுவையில் இருந்த இந்த வழக்கில் இருந்து கடந்த ஆண்டு ஜூன் மாதம் பொன்முடியை வேலூர் நீதிமன்றம் விடுவித்தது. ஆனால், பொன்முடிக்கு எதிரான இந்த சொத்துக் குவிப்பு வழக்கைத்தான் நீதிபதி ஆனந்த் வெங்கடேஷ் தாமாக முன்வந்து மறுஆய்வுக்கு எடுத்து விசாரித்து வருகிறார். வழக்கு மிக மோசமான முறையில் விசாரிக்கப்பட்டு இருப்பதால் தாமாக முன்வந்து விசாரிப்பதாக ஆனந்த் வெங்கடேஷ் விளக்கம் அளித்தார்.

​விரைவில் இறுதி விசாரணை

இந்த வழக்கு விசாரணையில் இருந்து நீதிபதி ஆனந்த் வெங்கடேஷை மாற்ற பொன்முடி தரப்பு உச்ச நீதிமன்றம் வரை சென்று எடுத்த முயற்சிகள் பலனளிக்கவில்லை. பொன்முடிக்கு எதிரான இந்த மறுஆய்வு வழக்கின் இறுதி விசாரணை ஏப்ரல் 15 முதல் 19ம் தேதி வரை நடைபெற உள்ளது.

மீண்டும் பொன்முடிக்கு என்ன சிக்கல்?

பொன்முடியைப் போல மற்ற அமைச்சர்களின் வழக்குகளை நீதிபதி ஆனந்த் வெங்கடேஷ் விசாரணைக்கு எடுத்துக்கொண்டுள்ளார். அவை விசாரணை நிலையில் இருந்தபோதே அமைச்சர்கள் வழக்கில் இருந்து விடுவிக்கப்பட்டுவிட்டனர். ஆனால், பொன்முடியின் வழக்கு என்பது அனைத்து தரப்பு வாதங்களும் நிறைவடைந்து தீர்ப்பு அளிக்கப்பட்டு பொன்முடி விடுவிக்கப்பட்டார்.

​அடுத்து என்ன நடக்கும்?

இதனால் பொன்முடியின் வழக்கில் நீதிபதி ஆனந்த் வெங்கடேசனே கிழமை நீதிமன்றத்தின் தீர்ப்பை ஆய்வு செய்து மீண்டும் தீர்ப்பு அளிக்கலாம் என்று கூறப்படுகிறது. ஒருவேளை தீர்ப்பு வழங்கப்பட்டு அது பொன்முடிக்கு எதிராக அமைந்தால் அது அவரது அமைச்சர் பதவிக்கு சிக்கலை ஏற்படுத்தலாம் என்கிறார்கள் சட்ட வட்டாரங்களில்.

பொன்முடி தரப்புக்கு நம்பிக்கை

இறுதி வாதங்கள் ஏப்ரல் 19ஆம் தேதி முடிந்தவுடன் ஐ.பெரியசாமி மறுஆய்வு வழக்குபோல தாமதமின்றி தீர்ப்பு வழங்கப்படலாம் என்பதால் பொன்முடி தரப்புக்கு மீண்டும் நெருக்கடி உண்டாகியுள்ளது. ஆகவே, இறுதி விசாரணை முடிந்து தீர்ப்பு எப்படி வரும் என்ற எதிர்பார்ப்பு திமுக மட்டுமின்றி அரசியல் வட்டாரங்களிலும் எழுந்துள்ளது.