அமலாக்கத்துறை அதிகாரி அங்கித் திவாரி கைது செய்யப்பட்ட வழக்கில் அமலாக்கத்துறை மற்றும் தமிழக லஞ்ச ஒழிப்புத்துறை இடையே நீதிமன்றத்தில் காரசார வாதம் நடந்தது.
மதுரை அமலாக்கத் துறை அதிகாரியான அங்கித் திவாரி என்பவர் திண்டுக்கல் அரசு மருத்துவக் கல்லூரி மருத்துவர் சுரேஷ் பாபுவை மிரட்டி 2 தவணையாக ரூ.40 லட்சம் லஞ்சம் பெற்றதாக புகார் எழுந்தது.
இதுதொடர்பாக கடந்த டிசம்பர் மாதம் 1-ம் தேதி போலீஸாரால் மடக்கிப்பிடித்து அங்கித் திவாரி கைது செய்யப்பட்டார். ஊழல், லஞ்சம், முறைகேடுகளைத் தடுக்க வேண்டிய அமலாக்கத்துறை அதிகாரியே மிரட்டி, லஞ்சம் வாங்கி கைதான விவகாரம் பெரும் பரபரப்பை ஏற்படுத்தியது.
அமலாக்கத்துறை அதிகாரி அங்கித் திவாரி
இந்நிலையில் அங்கித் திவாரியின் ஜாமீன் மனுக்கள் தொடர்ந்து நீதிமன்றத்தில் தள்ளுபடி செய்யப்பட்டது. இதையடுத்து நாளை வரை அவரது நீதிமன்ற காவல் நீட்டிக்கப்பட்டு இருந்தது.
இதனிடையே, அவரிடம் விசாரணை மேற்கொள்ள அனுமதி அளிக்கக் கோரி அமலாக்கத்துறையின் சார்பில் திண்டுக்கல் தலைமை குற்றவியல் நீதித்துறை நடுவர் நீதிமன்றத்தில் மனுத்தாக்கல் செய்யப்பட்டது.
கைது செய்யப்பட்ட அங்கித் திவாரி
இந்த வழக்கை விசாரித்த திண்டுக்கல் தலைமை குற்றவியல் நீதித்துறை நடுவர் மோகனா வழக்கை மீண்டும் இன்றைக்கு ஒத்திவைத்து இருந்தார். அதன்படி இன்று வழக்கு விசாரணைக்கு வந்தபோது, அங்கித் திவாரியை காவலில் எடுத்து விசாரிக்க, அமலாக்கத் துறையின் சார்பில் அனுமதி கேட்கப்பட்டது.
அதற்கு லஞ்ச ஒழிப்புத்துறை கடும் எதிர்ப்பு தெரிவித்தது. மேலும், “அங்கித் திவாரியிடம் தாங்கள் மீண்டும் விசாரணை நடத்த வேண்டி உள்ளதால் அமலாக்கத் துறை விசாரணைக்கு அனுமதி அளிக்கக்கூடாது” என லஞ்ச ஒழிப்புத்துறை சார்பில் வழக்கறிஞர் வாதாடினார்.
இருதரப்பு வாதங்களையும் கேட்ட நீதிபதி, வழக்கு விசாரணையை ஜனவரி 12-ம் தேதிக்கு ஒத்திவைத்து உத்தரவிட்டார்.
