திட்டமிட்டபடி நாளை (ஜன.09) முதல் போக்குவரத்து தொழிலாளர்கள் வேலை நிறுத்த போராட்டம் அறிவித்துள்ள நிலையில், தற்காலிக ஓட்டுநர், நடத்துநர் நியமனம் செய்யும் பணி தீவிரமாக நடைபெற்றுவருகிறது.
காலிபணியிடங்களை நிரப்ப வேண்டும்,15 வது ஊதிய ஒப்பந்த பேச்சுவார்த்தையை தொடங்க வேண்டும் உள்ளிட்ட 6 அம்ச கோரிக்கையை வலியுறுத்தி போக்குவரத்து தொழிற்சங்கத்தினர் நாளை முதல் வேலைநிறுத்த போராட்டம் அறிவித்துள்ளன. போக்குவரத்து தொழிற்சங்கங்கள் நாளை முதல் வேலை நிறுத்தம் அறிவித்துள்ள நிலையில், போக்குவரத்து தொழிற்சங்கத்தினருடன் முத்தரப்பு பேச்சுவார்த்தை நடைபெற்றது. தேனாம்பேட்டை டிஎம்எஸ் வளாகத்தில் தொழிலாளர் நலத்துறை சார்பில் முத்தரப்பு பேச்சுவார்த்தை நடைபெற்றது. இந்த பேச்சுவார்த்தை தோல்வியில் முடிந்ததாக கூறப்படுகிறது.
இதையடுத்து போக்குவரத்து துறை அமைச்சர் சிவசங்கர் தொழிற்சங்கங்கள் வேலை நிறுத்தத்தில் ஈடுபட்டாலும் அதை எதிர்கொள்ள தயார் என அறிவித்திருந்த நிலையில், போக்குவரத்து தொழிற்சங்கங்களான அண்ணா தொழிற்சங்க பேரவை தலைமையிலான தொழிற்சங்கங்கள் மற்றும் ஏஐடியுசி, சிஐடியு தலைமையிலான போக்குவரத்து தொழிற்சங்கங்கள் இன்று இரவு 12:00 மணி முதல் தமிழகம் முழுவதும் பேருந்துகள் இயங்காது என திட்ட வட்டமாக தெரிவித்துள்ளனர்.
இந்நிலையில் திருச்செந்தூர் அரசு போக்குவரத்து பணிமனையில் ஓட்டுநர், நடத்துனர் பணிக்கு தற்காலிக தொழிலாளர்களை நியமிக்கும் பணி தீவிரமாக நடைபெற்றுவருகிறது. இதுகுறித்து கருத்து தெரிவித்துள்ள சிஐடியு செளந்தராஜன், “2 ஆண்டுகளாக போக்குவரத்து துறையில் காலிப் பணியிடங்களை நிரப்பாத அரசு, போக்குவரத்து தொழிலாளர்கள் வேலை நிறுத்தம் அறிவித்ததும், 2 நாட்களில் தற்காலிக ஓட்டுநர்களை நியமித்து, பேருந்துகளை இயக்கப்போவதாக சொல்கிறார்கள். தற்காலிக ஓட்டுநர்களை நியமிப்பதால் மக்களின் பிரச்சனை தீரப்போவது இல்லை. மாறாக அது பிரச்சனையை தீவிரப்படுத்தும். ரோட்டில் ஒட்ட வேண்டிய பேருந்துகளை சென்ட்ரல் ஸ்டேஷனுக்குள் ஓட்டுவார்கள்” எனக் கூறியுள்ளார்.
