புதுடில்லி: கொரோனா பரவல் தொற்று தொடர்பாக, மத்திய அரசு தமிழக அரசுக்கு அறிவுரைகளை வழங்கியுள்ளது. அனைத்து அரசு மற்றும் தனியார் மருத்துவமனைகளில் கொரோனா தடுப்பு அவசர மருந்துகளை கையிருப்பு வைக்க வேண்டும் என மாநில சுகாதார துறைக்கு மத்திய சுகாதார துறை உத்தரவிட்டுள்ளது.
இந்தியாவில் கேரளா உள்ளிட்ட மாநிலங்களில் உருமாறிய கொரோனா தொற்று அதிகம் பரவி வருகிறது. இந்தோனேசியா, சிங்கப்பூர் உள்ளிட்ட நாடுகளில் கொரோனா தொற்று அதிகரித்து வருகிறது என உலக சுகாதார அமைப்பு தெரிவித்துள்ளது. தமிழகத்திலும் கடந்த சில தினங்களாக கொரோனா தொற்று கணிசமாக உயர்ந்து வருகிறது.
கொரோனா பரவல் தொற்று தொடர்பாக, மத்திய சுகாதாரத்துறை தமிழகம் உள்ளிட்ட மாநில சுகாதார துறை அதிகாரிகளுக்கு அறிவுரைகளை வழங்கியுள்ளனர். இது குறித்து மத்திய சுகாதாரத்துறை வெளியிட்டுள்ள அறிக்கை: ” அனைத்து அரசு மற்றும் தனியார் மருத்துவமனைகளில் கொரோனா தடுப்பு அவசர மருந்துகளை கையிருப்பு வைக்க வேண்டும்.
வென்டிலேட்டர், ஆக்சிஜன் சிலிண்டர்கள், ஆக்சிஜன் பைப் லைன்கள் சீராக இயங்குகிறதா? என்பதை கண்காணிக்க வேண்டும். மருத்துவமனை பணியாளர்கள், நோயாளிகள் என அனைவரையும் மாஸ்க் அணிய அறிவுறுத்த வேண்டும்.” இவ்வாறு அந்த அறிக்கையில் தெரிவிக்கப்பட்டுள்ளது.
