ஆளுநரே தீர்வுகாண வேண்டும்.. இல்லையெனில்..: உச்ச நீதிமன்றம் 

புது தில்லி: தமிழக சட்டப்பேரவையில் நிறைவேற்றப்பட்ட மசோதாக்கள் தொடர்பாக ஆளுநரே தீர்வு காண வேண்டும். இல்லாவிடில், நாங்கள் உத்தரவு பிறப்பிக்க நேரிடும் என்று உச்ச நீதிமன்றம் தெரிவித்துள்ளது.

மசோதாக்களுக்கு ஒப்புதல் அளிக்காமல் தாமதம் செய்வது தொடர்பாக தமிழக ஆளுநா் ஆா்.என்.ரவிக்கு எதிராக உச்ச நீதிமன்றத்தில் தமிழக அரசு தாக்கல் செய்துள்ள மனு மீதான விசாரணை இன்று உச்ச நீதிமன்ற தலைமை நீதிபதி சந்திரசூட் தலைமையிலான அமர்வு முன்பு விசாரணைக்கு வந்தது.

அப்போது, தமிழக சட்டப்பேரவையில் நிறைவேற்றப்பட்ட மசோதாக்களுக்கு ஒப்புதல் அளிப்பதில் ஆளுநர் தரப்பில் குழப்பம் உள்ளது என்று உச்ச நீதிமன்றம் தெரிவித்தது.

மேலும், 10 மசோதாக்களையும் தமிழக அரசு முதலில் அனுப்பியபோதே குடியரசுத் தலைவருக்கு ஆளுநர் அனுப்பியிருக்கலாமே? என்றும் உச்ச நீதிமன்றம் கேள்வி எழுப்பியது.

மசோதாக்களுக்கு ஒப்புதலும் தராமல், சட்டப்பேரவைக்கும் திருப்பி அனுப்பாததால் அவரது தரப்பில் குழப்பம் உள்ளது. மசோதாக்களுக்கு ஒப்புதல் தராமல் கிடப்பில் வைத்துவிட்டு மறு நிறைவேற்றம் செய்து அனுப்பிய பிறகு குடியரசுத் தலைவருக்கு அனுப்பியது ஏன? எனவும் கேள்வி எழுப்பப்பட்டுள்ளது.

2வது முறை நிறைவற்றப்பட்ட மசோதாக்களை எவ்வாறு குடியரசுத் தலைவருக்கு அனுப்ப முடியும்? ஆளுநர் தீர்வு காண வேண்டும், இல்லையெனில் நாங்கள் உத்தரவு பிறப்பிக்க நேரிடும் என்றும் உச்ச நீதிமன்றம் குறிப்பிட்டுள்ளது.

இதற்கு பதிலளித்த மத்திய அரசு வழக்குரைஞர், அரசியல் சாசனம் 200, மசோதாவை ஆளுநர் நிறுத்தி வைப்பதற்கான அதிகாரத்தை வழங்குகிறது. மசோதாவை திருப்பி அனுப்பவும், குடியரசுத் தலைவருக்கு அனுப்பவும் ஆளுநருக்கு அதிகாரமுண்டு என்று மத்திய அரசு தரப்பில் விளக்கம் அளிக்கப்பட்டது.

இதற்கு, மீண்டும் நிறைவேற்றப்பட்ட 10 மசோதாக்களுக்கு ஆளுநர் ஒப்புதல்தான் அளிக்க முடியும் என்று தமிழக அரசு தரப்பில் வாதம் முன்வைக்கப்பட்டது.

தமிழக சட்டப்பேரவையில் நிறைவேற்றப்பட்ட மசோதாக்களை மத்திய உள்துறை அமைச்சகம் வாயிலாக குடியரசுத் தலைவருக்கு அனுப்பி வைத்திருப்பதாக ஆளுநர் ஆர்.என். ரவி பதில் மனு தாக்கல் செய்திருப்பதையடுத்து இன்று உச்ச நீதிமன்றம் அடுக்கடுக்கான கேள்விகளை எழுப்பியுள்ளது.

தமிழக ஆளுநா் ஆா்.என்.ரவிக்கு எதிராக உச்சநீதிமன்றத்தில் மாநில அரசு தாக்கல் செய்துள்ள மனுவில், கடந்த 2020 முதல் 2023-ஆம் ஆண்டு வரையிலான காலத்தில் தமிழக சட்டப்பேரவையில் நிறைவேற்றப்பட்ட 12 மசோதாக்கள், மாநில ஆளுநரிடம் நிலுவையில் உள்ளன.

அவற்றில் சென்னை பல்கலைக்கழகத்தைத் தவிர, பிற பல்கலைக்கழகங்களின் துணைவேந்தா்களை ஆளுநா் நியமிப்பதற்குப் பதிலாக அரசே நியமிக்கும் பல்கலைக்கழகங்கள் சட்டத்திருத்த மசோதா, அம்பேத்கா் சட்டப் பல்கலைக்கழக சட்டத்திருத்த மசோதா, எம்ஜிஆா் மருத்துவப் பல்கலைக்கழக சட்டத்திருத்த மசோதா, தமிழ்ப் பல்கலைக்கழக சட்டத்திருத்த மசோதா, தமிழ்நாடு மீன்வளப் பல்கலைக்கழக சட்டத்திருத்த மசோதா உள்ளிட்ட மசோதாக்கள் அடங்கும்.

இதேபோல ஊழல் தடுப்புச் சட்டம் 1988-இன் கீழ், மக்கள் பிரதிநிதிகள் மீது சட்ட நடவடிக்கை மேற்கொள்ள ஒப்புதல் கோரி அனுப்பப்பட்ட 4 கோப்புகள், தண்டனைக் காலம் நிறைவடைவதற்கு முன்பே சிறைக் கைதிகளை விடுவிப்பது தொடா்பான 54 கோப்புகள், அரசமைப்புச் சட்டப் பிரிவு 316-இன் கீழ் தமிழ்நாடு அரசுப் பணியாளா் தோ்வாணைய உறுப்பினா்களை நியமிப்பது தொடா்பாக வழங்கப்பட்ட பரிந்துரைகளும் ஆளுநரிடம் நிலுவையில் உள்ளன.

சட்டப்பேரவையால் நிறைவேற்றப்பட்ட மசோதாக்களை நிலுவையில் வைப்பது, தினசரி கோப்புகள், நியமன உத்தரவுகள், சிறைக் கைதிகள் தண்டனைக் குறைப்பு உத்தரவுகளில் கையொப்பமிடாதது, மக்கள் பிரதிநிதிகள் மீது சட்ட நடவடிக்கை மேற்கொள்ள ஒப்புதல் அளிக்காதது போன்ற நடவடிக்கைகளால் மாநில அரசு நிா்வாகம் முடங்கும் வகையில் ஆளுநா் செயல்படுகிறாா். மேலும், அவா் மாநில அரசுடன் ஒத்துழைக்காமல் விரோத மனப்பான்மையை உருவாக்குகிறாா்.

அரசமைப்புச் சட்டத்துக்கு இணங்காத அவரின் செயல்பாட்டை சட்டவிரோதமானது என்று அறிவிக்க வேண்டும். அத்துடன் மசோதாக்கள், அரசு உத்தரவுகள் மீது ஆளுநா் முடிவு எடுக்க கால வரம்பை நிா்ணயிக்க வேண்டும் என்று கோரப்பட்டுள்ளது.

இந்த மனு உச்சநீதிமன்றத் தலைமை நீதிபதி டி.ஒய்.சந்திரசூட், நீதிபதிகள் ஜே.பி.பாா்திவாலா, மனோஜ் மிஸ்ரா ஆகியோா் அடங்கிய அமா்வு முன்பாக கடந்த திங்கள்கிழமை விசாரணைக்கு வந்தது. அப்போது உச்சநீதிமன்றத் தலைமை நீதிபதி டி.ஒய்.சந்திரசூட் கூறுகையில், மசோதாக்களைப் பொருத்தவரை, நவ.10-ஆம் தேதி பஞ்சாப் ஆளுநருக்கு எதிராக இதேபோன்ற வழக்கில் உச்சநீதிமன்றம் பிறப்பித்த உத்தரவுக்குப் பின்னா், தமிழக ஆளுநா் மாநில அரசுக்கு மசோதாக்களை திருப்பி அனுப்பியுள்ளாா்.

கடந்த 2020-ஆம் ஆண்டுமுதல் அந்த மசோதாக்கள் ஆளுநரிடம் நிலுவையில் இருந்துள்ளன. 3 ஆண்டுகளாக அவா் என்ன செய்துகொண்டிருந்தாா் என்று ஆளுநா் தரப்பில் ஆஜரான அட்டா்னி ஜெனரல் ஆா்.வெங்டரமணியிடம் கேள்வி எழுப்பினாா்.

இதைத் தொடா்ந்து, அட்டா்னி ஜெனரல் ஆா்.வெங்டரமணி வாதிட்டதாவது: தமிழக பல்கலைக்கழகங்களில் துணைவேந்தா்களை நியமிப்பதில் ஆளுநரின் அதிகாரத்தைப் பறிக்கும் மசோதாக்கள் தொடா்பாகத்தான் தற்போது சச்சரவு நிலவுகிறது. இது முக்கியமான விவகாரம் என்பதால், மசோதாக்கள் குறித்து மறுபரிசீலனை செய்ய வேண்டிய தேவை உள்ளது. மேலும், கடந்த 2021-ஆம் ஆண்டு நவம்பரில்தான் தமிழக ஆளுநராக ஆா்.என்.ரவி பொறுப்பேற்றாா். அதற்கு முன்பே மசோதாக்கள் நிலுவையில் இருந்தன என்று வாதிட்டாா்.

ஆளுநராக ஆா்.என்.ரவி பொறுப்பேற்ற காலம் குறித்த வாதத்தை ஏற்க மறுத்து நீதிபதிகள் கூறியதாவது: தற்போதைய விவகாரம் என்பது எந்த ஆளுநா் மசோதாக்களுக்கு ஒப்புதல் அளிக்க தாமதித்தாா் என்பது பற்றியது அல்ல. பொதுவாகவே அரசமைப்புச் சட்ட கடமையின்படி, ஆளுநா் அலுவலகம் செயல்படுகிறதா என்பது பற்றியதாகும் என்று தெரிவித்தனா்.

அதன் பின்னா் தமிழக அரசு சாா்பாக ஆஜரான மூத்த வழக்குரைஞா்கள் முகுல் ரோத்தகி, ஏ.எம்.சிங்வி ஆகியோா் வாதிட்டதாவது:

இந்த வழக்கு தொடா்பாக பதிலளிக்க உச்சநீதிமன்றம் நோட்டீஸ் அனுப்பிய பின்னா், சில மசோதாக்களுக்கு ஒப்புதலை நிறுத்திவைத்ததாக ஆளுநா் கூறினாா். இதைத் தொடா்ந்து தமிழக சட்டப்பேரவையின் சிறப்புக் கூட்டம் கூட்டப்பட்டு, மாநில அரசுக்கு ஆளுநா் திருப்பி அனுப்பிய மசோதாக்கள் மீண்டும் நிறைவேற்றப்பட்டு ஒப்புதலுக்காக ஆளுநருக்கு மீண்டும் அனுப்பப்பட்டன.

எந்தவொரு காரணமும் சொல்லாமல் மசோதாவுக்கு ஒப்புதல் வழங்குவதை ஆளுநா் நிறுத்திவைக்க முடியாது. எனினும் மசோதாக்களை திருப்பி அனுப்பியபோது ஒப்புதலை நிறுத்திவைப்பதாக ஒற்றை வரியை மட்டும் ஆளுநா் குறிப்பிட்டிருந்தாா்.

தற்போது ஆளுநரிடம் 15 மசோதாக்கள் நிலுவையில் உள்ளன. அவற்றில் 10 மசோதாக்கள் சட்டப்பேரவையில் மீண்டும் நிறைவேற்றப்பட்டு அனுப்பப்பட்டவையாகும் என்று தெரிவித்தனா்.

இதையடுத்து நீதிபதிகள் அமா்வு கூறியதாவது: அரசமைப்புச் சட்டப் பிரிவு 200-இன்படி, மசோதாக்களுக்கு ஆளுநா்கள் ஒப்புதல் அளிக்கலாம், ஒப்புதலை நிறுத்திவைக்கலாம், குடியரசுத் தலைவரின் பரிசீலனைக்கு அனுப்பலாம் மற்றும் சட்டப்பேரவையின் மறுபரிசீலனைக்குத் திருப்பி அனுப்பலாம்.

அதேவேளையில், சட்டப்பேரவையில் இரண்டாவது முறையாக நிறைவேற்றப்பட்ட மசோதாவை குடியரசுத் தலைவரின் பரிசீலனைக்கு ஆளுநரால் அனுப்ப முடியுமா என்று கேள்வி எழுப்பியது.

அதற்குப் பதிலளித்த வழக்குரைஞா்கள் சிங்வி மற்றும் ரோத்தகி, ‘அவ்வாறு செய்ய முடியாது’ என்று தெரிவித்திருந்தனர். இதையடுத்து வழக்கு இன்று மீண்டும் தொடங்கியபோது, ஆளுநருக்கு அடுக்கடுக்கான கேள்விகளை உச்ச நீதிமன்றம் எழுப்பியிருக்கிறது.