அமெரிக்க வெளியுறவுத்துறை அமைச்சர் மார்கோ ரூபியோ மூன்று நாள் பயணமாக இந்தியா வந்துள்ளார். அவரது வருகை இரு நாடுகளுக்கும் இடையிலான நல்லுறவையும், வர்த்தக உறவையும் மேம்படுத்தும் என்ற எதிர்பார்ப்பு அதிகரித்துள்ளது. அமெரிக்க வெளியுறவுத்துறை அமைச்சர் மார்கோ ரூபியோ நெட்வொர்க்18 குழுமத்தின் தலைமை ஆசிரியர் ராகுல் ஜோஷிக்கு அளித்த பிரத்யேகப் பேட்டியளித்தார்.
அப்போது பேசிய அவர், ரஷ்யா மற்றும் அதன் நட்பு நாடுகள் மீது அமெரிக்கத் தடைகள் விதிக்கப்பட்டதாகவும், ஆனால் அந்தத் தண்டனைகள் மற்ற நாடுகளுக்கும் பரவி, எதிர்மறையான தாக்கத்தை ஏற்படுத்தக்கூடும் என்பது உணரப்பட்டதாக மார்கோ ரூபியோ தெரிவித்தார். மேலும் அமெரிக்கா ஒரு சமநிலைப்படுத்தும் முயற்சியை மேற்கொள்கிறது. ஒருபுறம், இந்தப் போரில் ஈடுபட்டுள்ள நாடுகளை ஒரு உடன்படிக்கைக்கு வருமாறு அழுத்தம் கொடுக்க முயற்சிப்பதற்கும், மறுபுறம் அவ்வாறு அழுத்தம் கொடுக்கும்போது சில சமயங்களில் அது மற்ற நாடுகளுக்கும் பரவி, எதிர்மறையான தாக்கத்தை ஏற்படுத்துகிறது என்பதை உணர்ந்துகொள்வதற்கும் இடையில் அவர்கள் எப்போதும் போராடிக் கொண்டிருக்கிறார்கள் என்று தெரிவித்தார்.
உக்ரைன் மற்றும் ரஷ்யாவில் நடக்கும் நிகழ்வுகள் மீதான உங்கள் அக்கறையையும், அது உலக அளவில் ஏற்படுத்தும் தாக்கத்தையும் நீங்கள் சமநிலைப்படுத்த வேண்டும். எனவே, அதற்கும் இந்தியாவுடனான ஒரு வர்த்தக ஒப்பந்தத்திற்கும் இடையில், இந்தப் பிரச்சினைகள் தீர்க்கப்படும் என்று நம்புகிறேன். ஆனால், பதற்றம் நிலவுவதை நான் புரிந்துகொள்கிறேன் என்றும் அவர் தெரிவித்தார்.
நவம்பரில் நடைபெறவிருக்கும் அமெரிக்க இடைக்காலத் தேர்தல்களுக்கு முன்னதாக, எரிசக்தி விலைகள் கடுமையாக உயர்ந்து வரும் நிலையில், மாஸ்கோவின் டீசல் ஏற்றுமதி மீதான கட்டுப்பாடுகளைத் தளர்த்துவது தொடர்பாக ரஷ்யாவுடன் ஒரு ஒப்பந்தத்தை டிரம்ப் அறிவித்ததை தொடர்ந்து மார்க்கோ ரூபியா விளக்கமளித்தார். டிரம்பின் இந்த நடவடிக்கை, பல நட்பு நாடுகளிடமிருந்தும், குறிப்பாக ஐரோப்பாவிலிருந்தும், மற்றும் உக்ரைன் அதிபர் வொலோடிமிர் ஜெலென்ஸ்கியிடமிருந்தும் விமர்சனங்களைச் சந்தித்து வருகிறது.
குறிப்பாக, டிரம்பின் இந்த ஒப்பந்தம் வாஷிங்டனின் எரிசக்திப் பாதுகாப்பு மற்றும் வெளியுறவுக் கொள்கையில் ஒரு அடிப்படை மாற்றத்தையும் குறிக்கிறது. கடந்த ஆண்டு, ரஷ்யாவின் போர் பொருளாதாரத்தின் அடிப்படையாக எரிபொருள் விற்பனை அமைகிறது என்று கூறி ரஷ்ய எண்ணெயை இந்தியா வாங்கியதற்காக, டிரம்ப் 25% கூடுதல் வரியை விதித்ததைத் தொடர்ந்து, இந்தியாவுக்கும் அமெரிக்காவுக்கும் இடையிலான உறவுகள் மோசமடைந்தன.
அமெரிக்க-ஈரான் போரும், அதைத் தொடர்ந்து ஏற்பட்ட உலகளாவிய எரிசக்தி நெருக்கடியும், அடுத்த மாதம் நடைபெறவிருக்கும் முக்கிய இடைக்காலத் தேர்தல்களுக்கு முன்னதாக டிரம்புக்கு அழுத்தத்தை ஏற்படுத்தியுள்ளன. டிரம்பின் தேசியப் பாதுகாப்பு விலக்குக்கு முன்னர் 100% வரிகளை விதிக்கவிருந்த ரஷ்யா மீதான தடைகள் மசோதா குறித்தும் இந்திய அரசு கவலைகளை எழுப்பியிருந்தது.
டிரம்பின் இந்த விலக்கு, எரிபொருள் விலைகளைக் குறைப்பதையும், அதேவேளையில் இந்தியா போன்ற நாடுகள் ரஷ்ய எரிசக்தியைக் கொள்முதல் செய்வது தொடர்பான அழுத்தத்தை ஓரளவு தணிப்பதையும் நோக்கமாகக் கொண்டுள்ளது. ரஷ்ய எண்ணெய் கொள்முதலைக் குறைக்குமாறு வாஷிங்டன் இந்தியாவிற்கு மீண்டும் மீண்டும் அழுத்தம் கொடுத்து வருகிறது.
