Last Updated:
எதிர்கால போர் சவால்களை கருத்தில் கொண்டு ‘மிஷன் சுதர்ஷன் சக்ரா’ திட்டம் முன்னெடுக்கப்பட்டு வருவதாக மத்திய அமைச்சர் ராஜ்நாத் சிங் தெரிவித்தார்.
“தூதரக நடவடிக்கைகள் மட்டுமன்றி, ராணுவத்தையும் தயார் நிலையில் வைக்க வேண்டும், அந்த சமநிலையும் அவசியம். இதன் அடிப்படையில் விரிவான பாதுகாப்புக் கொள்கையை உருவாக்க வேண்டும்” என்று மத்திய பாதுகாப்புத் துறை அமைச்சர் ராஜ்நாத் சிங் தெரிவித்துள்ளார்.
நேற்று நடந்த DEFCON 2026 நிகழ்ச்சியில் பேசிய அவர், “இந்தியாவின் பாதுகாப்பு அமைப்புகள் குறித்து பொதுமக்களிடையே தற்போது விழிப்புணர்வு அதிகரித்துள்ளது. பாதுகாப்பு மற்றும் தேசிய பாதுகாப்பு விவகாரங்கள் என்பது, ஊடகங்களிலும் முக்கிய விவாதப் பொருளாக மாறியுள்ளது. அதேநேரம் பாதுகாப்புத் துறையில் நாம் (இந்தியா) நமது திறன்களை வலுப்படுத்திக் கொள்ள விரும்பினால், பாதுகாப்புச் சூழலுக்கு ஏற்ப தற்போதைய நம்முடைய அணுகுமுறைகளையும் நாம் மறுபரிசீலனை செய்ய வேண்டும்.
போர் என்பது தற்போது நிலம், கடல், வான்வெளி ஆகியவற்றுடன் மட்டும் நின்றுவிடவில்லை. சைபர் மற்றும் விண்வெளி உள்ளிட்ட புதிய களங்களும் போரின் முக்கிய பகுதிகளாக மாறியுள்ளன. இந்த புதிய சவால்களை எதிர்கொள்ள தொழில்நுட்ப வளர்ச்சிக்கும் உள்நாட்டு பாதுகாப்புத் தயாரிப்புகளுக்கும் முக்கியத்துவம் அளிக்க வேண்டும்” என்று கூறினார். மேலும் ருஸ்தம், கடக், நாகாஸ்திரா உள்ளிட்ட உள்நாட்டில் உருவாக்கப்பட்ட ஆளில்லா விமானங்களின் திறனை அவர் சுட்டிக்காட்டினார். ஆபரேஷன் சிந்தூரின்போது ட்ரோன் போர் திறனில் இந்தியாவின் வலிமை வெளிப்பட்டதாகவும், எதிர்கால போர் சவால்களை கருத்தில் கொண்டு ‘மிஷன் சுதர்ஷன் சக்ரா’ திட்டம் முன்னெடுக்கப்பட்டு வருவதாகவும் ராஜ்நாத் சிங் தெரிவித்தார்.
