Last Updated:
வறுத்த கடலை, பட்டாணி உள்ளிட்டவற்றில் கலக்கப்படும் சேர்மானங்களின் மாதிரிகளை எடுத்து உரிய சோதனைகளை மேற்கொள்ள உத்தரவிடப்பட்டுள்ளது
வறுத்த கடலை மற்றும் பட்டாணி உள்ளிட்டவற்றில் தடைசெய்யப்பட்ட நிறமி பயன்படுத்தப்படுகிறதா என ஆய்வுகளை மேற்கொள்ள மாநிலங்களுக்கு இந்திய உணவுப் பாதுகாப்பு ஆணையம் உத்தரவிட்டுள்ளது.
உணவகங்கள், சாலையோரக் கடைகள் மற்றும் ஆன்லைன் தளங்களில் விற்கப்படும் வறுத்த கடலை மற்றும் பட்டாணி உள்ளிட்டவற்றில் செயற்கை நிறமிகள் அதிக அளவில் சேர்க்கப்படுவதாக அண்மையில் புகார்கள் எழுந்தன. குறிப்பாக மஞ்சள் நிறத்திற்காக ஆராமைன் என்ற செயற்கை நிறமூட்டி அதிகளவில் பயன்படுத்தப்படுவதாக கூறப்படுகிறது. இவ்வகை நிறமூட்டிகள் தடை செய்யப்பட்டவை எனவும், இவை பல்வேறு உடல்நலப் பாதிப்புகளுக்கு வித்திடும் எனவும் கூறப்படுகிறது. இந்நிலையில் தடைசெய்யப்பட்ட நிறமிகள் பயன்பாடு குறித்து அந்தந்த மாநில அமைப்புகள் தீவிர ஆய்வுகளை மேற்கொள்ள இந்திய உணவுப் பாதுகாப்பு மற்றும் தரநிலைகள் ஆணையம் உத்தரவிட்டுள்ளது.
வறுத்த கடலை, பட்டாணி உள்ளிட்டவற்றில் கலக்கப்படும் சேர்மானங்களின் மாதிரிகளை எடுத்து உரிய சோதனைகளை மேற்கொள்ளவும் உத்தரவிடப்பட்டுள்ளது. உற்பத்தி நிலையங்கள், சேமிப்புக் கூடங்கள், பதப்படுத்தும் இடங்கள், விநியோகிக்கப்படும் நிலையங்கள் உள்ளிட்டவற்றில் இது தொடர்பான முறையான ஆய்வுகளை மேற்கொள்ளவும் அந்த உத்தரவில் தெரிவிக்கப்பட்டுள்ளது.
December 10, 2025 4:12 PM IST
