கடந்த சில நாள்களுக்கு முன்பு செங்கோட்டையன் கட்சியில் இருந்து நீக்கப்பட்ட நிலையில் , அவரது ஆதரவாளர்களான முன்னாள் எம்.பி. சத்யபாமா உள்ளிட்டோரும் அடிப்படை உறுப்பினர் பதவியில் இருந்து நீக்கி அதிமுக பொதுச் செயலாளர் எடப்பாடி பழனிசாமி உத்தரவிட்டுள்ளார்.
இதைத் தொடர்ந்து, கோபிசெட்டிபாளையத்தில் இன்று( நவ.7) செய்தியாளர்களைச் சந்தித்த செங்கோட்டையன் எடப்பாடி பழனிசாமியை கடுமையாக விமர்சித்தார்.
“பழனிசாமியின் குடும்பத்தினரே கட்சியை நடத்துகிறார்கள். அதிமுக ஆட்சியை பாதுகாத்த பாஜகவுடனான கூட்டணியை எடப்பாடி முறியடித்தார்.
அதிமுக ஒருங்கிணைப்பு தொடர்பாக பேசத்தான் பாஜக என்னை அழைத்தது. ஒருங்கிணைப்பு குறித்து பேசியபோது பழனிசாமி என்ன வார்த்தைகள் கூறினார் என்று எனக்கு தெரியும்.
பாஜகவை விட்டால் நமக்கு வேறு வழி இல்லை. எங்களை விட்டால் பாஜகவிற்கு வேறு வழியில்லை என்று கூறினேன். என்னை வைத்து அதிமுகவை உடைக்க பாஜக ஒருபோதும் முயற்சி செய்யவில்லை.
குடும்பத்தில் சண்டை நடந்தால் அவர்கள் எல்லோரும் ஒன்று சேர்வது இல்லையா? அதெல்லாம் இயல்புதான்.
கொல்லைப்புறம் வழியாக முதலவரானவர் தான் எடப்பாடி பழனிசாமி. கொடநாடு வழக்கை சிபிஜ விசாரணைக்கு மாற்றக் கோரி இதுவரை ஏன் கோரிக்கை வைக்கவில்லை.
கோபிச்செட்டிபாளையம் தொகுதியில் நான் எதுவும் செய்யவில்லை என்று அவர் கூறுவது வேதனை அளிக்கிறது.
