இலைக் கட்சியில், பெல் மாஜியின் நிழலாக வலம்வந்த நிலவுப் பிரமுகர், அந்தக் கட்சியிலிருந்து விலகி, ஆறு மாதங்கள் ஆகிவிட்டன. கட்சியிலிருந்து விலகிய பிறகு, அவர் அமைதியோ அமைதியாக இருந்த நிலையில், அண்மையில் தனது பிறந்தநாளை பிரமாண்டமாகக் கொண்டாடியிருக்கிறார். தன் ஏரியா முழுக்க போஸ்டர்கள் அடித்து, தனது ஆதரவாளர்களுக்குக் கறி விருந்தும் கொடுத்துள்ளார். ஆறு மாதமாக அமைதியாக இருந்தவர், திடீரென களத்தில் இறங்கியதற்குப் பின்னால், பெரும் பிளான் இருப்பதாகச் சொல்கிறார்கள் அவரது ஆதரவாளர்கள். அதாவது, ‘வரும் தேர்தலில் சூரியக் கட்சியில் இணைந்து, மான்செஸ்டர் மாவட்டத்தில் ஏதாவது ஒரு தொகுதியில் இறங்கி, மாஜிக்கு டஃப் கொடுப்பதுதான் அவரது பிளான்’ என்கிறார்கள். ஆனால், இதுவரையில் சூரியக் கட்சியிலிருந்து நேசக்கரம் ஏதும் அவருக்கு நீட்டப்படவில்லையாம். அவர்களின் கவனத்தை ஈர்ப்பதற்காகவும்தான், தன் பிறந்தநாளைத் தடபுடலாகக் கொண்டாடியிருக்கிறாராம் நிலவுப் பிரமுகர்!
