Last Updated:
CP Radhakrishnan | குடியரசு துணைத் தலைவர் பதவியேற்பு விழாவில் பதவிவிலகிய ஜெகதீப் தன்கரும் மனைவியுடன் பங்கேற்றார்.
இன்று குடியரசுத் தலைவர் மாளிகையில் நடைபெற்ற பதவியேற்பு விழாவில், இந்தியாவின் 15-வது குடியரசுத் துணைத் தலைவராக சி.பி. ராதாகிருஷ்ணன் பதவி ஏற்றார்.
குடியரசுத் துணைத் தலைவராக இருந்த ஜெகதீப் தன்கர் கடந்த ஜூலை மாதம் 21 ஆம் தேதி பதவி விலகியதைத் தொடர்ந்து மீண்டும் தேர்தல் அறிவிக்கப்பட்டது.
இதையடுத்து NDA கூட்டணியின் வேட்பாளராக சி.பி. ராதாகிருஷ்ணன் களமிறக்கப்பட்டார். அவருக்கு எதிராக, I.N.D.I.A. கூட்டணியின் சார்பில் முன்னாள் உச்ச நீதிமன்ற நீதிபதி பி. சுதர்சன் ரெட்டி போட்டியிட்டார்.
செப்டம்பர் 9ஆம் தேதி நடைபெற்ற தேர்தலில், சி.பி. ராதாகிருஷ்ணன் 452 வாக்குகளைப் பெற்றார். அவரை எதிர்த்து போட்டியிட்ட பி. சுதர்சன் ரெட்டி 300 வாக்குகளைப் பெற்றார். இதனால் NDA கூட்டணியின் வேட்பாளர் சி.பி. ராதாகிருஷ்ணன் வெற்றி பெற்றதாக அறிவிக்கப்பட்டது.
இதையடுத்து இன்று காலை குடியரசுத் தலைவர் மாளிகையில் நடைபெற்ற பதவியேற்பு விழாவில், சி.பி. ராதாகிருஷ்ணன், இந்தியாவின் 15வது துணை குடியரசுத் தலைவராக பதவியேற்றார். குடியரசுத் தலைவர் திரௌபதி முர்மு அவருக்குப் பதவிப்பிரமாணம் செய்து வைத்தார்.
September 12, 2025 11:55 AM IST
