வரதட்சணை கொடுமையின் உச்சம்.. இளம்பெண்ணுக்கு நேர்ந்த கொடூரம்.. விசாரணையில் பகீர் தகவல்கள்! | இந்தியா

மத்தியபிரதேச மாநிலம் கார்கோன் மாவட்டத்தைச் சேர்ந்த 23 வயதான குஷ்பு பிப்லியா என்ற இளம் பெண்ணுக்கும், திலீப் பிப்லியா என்பவருக்கும் கடந்த பிப்ரவரி மாதம் திருமணம் நடைபெற்றது. திருமணமான நாளிலிருந்தே கணவன் அவரை அடித்து துன்புறுத்தி வந்துள்ளார். பெற்றோர் வற்புறுத்தியதால் தான் குஷ்புவை திருமணம் செய்ததாகவும், கேட்ட வரதட்சணையை குஷ்புவின் பெற்றோர் கொடுக்கவில்லை என்றும் கூறி தொடர்ந்து டார்ச்சர் செய்து வந்துள்ளார். இதனால் மன உளைச்சலுக்கு ஆளான குஷ்பு கணவனின் அனைத்து துன்புறுத்தல்களையும் பொறுத்துக் கொண்டு வாழ்ந்து வந்துள்ளார்.

இந்த நிலையில், கடந்த ஞாயிற்றுக்கிழமை இரவு, குடிபோதையில் இருந்த கணவன் வழக்கம்போல் மனைவியை துன்புறுத்த ஆரம்பித்திருக்கிறார். மனைவி குஷ்புவை கண்மூடித்தனமாக தாக்கியவர், அவரை தரதரவென சமையலறைக்கு கால்களைப் பிடித்து இழுத்துச் சென்றுள்ளார். அங்கு அவரது கை, கால்களை கட்டிப்போட்டு, சூடான கத்தியால் மார்பு, கைகள் மற்றும் கால்களில் கடுமையாக சூடு வைத்துள்ளார். இதனால் அலறித் துடித்திருக்கிறார் குஷ்பு. இருப்பினும் மனம் இரங்காத கணவன், கத்தியை கேஸ் அடுப்பில் கொதிக்க வைத்து, வாயில் சூடு வைத்து துன்புறுத்தியிருக்கிறார்.

இந்த தாக்குதல் சம்பவம் நடந்தபோது, வீட்டில் மற்ற குடும்ப உறுப்பினர்களும் இருந்துள்ளனர். ஆனால் யாரும், கொடுமைப்படுத்திய கணவனை தடுக்கவில்லை எனக் கூறப்படுகிறது. இதையடுத்து, படுகாயமடைந்த குஷ்பு மறுநாள் திங்கள்கிழமை அதிகாலை 4.30 மணியளவில் வீட்டு வேலைக்காரரின் செல்போன் மூலம் பெற்றோருக்கு தகவல் கொடுத்துள்ளார். தகவலறிந்து பதறிப்போன குஷ்புவின் பெற்றோர், விரைந்து வந்து தங்களது மகளை காப்பாற்றியுள்ளனர்.