சாதி மாறி திருமணம்.. மகளின் கணவரை சுட்டுக்கொன்ற தந்தை.. பீகாரில் பரபரப்பை ஏற்படுத்திய ஆணவக் கொலை! | இந்தியா

பீகார் மாநிலத்தில் உள்ள தர்பங்கா மருத்துவக் கல்லூரி மருத்துவமனையில் பிஎஸ்சி நர்ஸ்சிங் 2ஆம் ஆண்டு படித்து வந்தவர் ராகுல் குமார். அதே கல்லூரியில் முதலாம் ஆண்டு நர்சிங் படித்து வந்தவர் தானுபிரியா. இருவரும் வெவ்வேறு சமூகத்தைச் சேர்ந்தவர்கள் என்ற போதும், ஒருவரை ஒருவர் காதலித்து வந்துள்ளனர். வீட்டில் இவர்களது காதலுக்கு கடும் எதிர்ப்பு எழவே, பெற்றோரை எதிர்த்து இருவரும் 4 மாதங்களுக்கு முன் திருமணம் செய்து கொண்டனர்.

மகளின் காதலன் வேறு சமூகத்தைச் சேர்ந்தவர் என்பதால் தந்தை பிரேம் ஷங்கருக்கு இந்த திருமணத்தில் சுத்தமாக விருப்பமே இல்லை. ஒரு கட்டத்தில் பொறுமை இழந்த அவர் மகளின் கணவரை தீர்த்துக் கட்டி விடுவது என்ற முடிவுக்கு வந்துள்ளார். அதன்படி கைத்துப்பாக்கி ஒன்றை எடுத்துக் கொண்டு, மகளும், மருமகனும் படித்து வந்த மருத்துவமனை விடுதிக்கு சென்றுள்ளார். அங்கு மருமகன் ராகுல் குமாரிடம் சென்று சமாதானப் பேச்சுவார்த்தை நடத்துவதுபோல் நாடகமாடிய பிரேம் ஷங்கர்.

திடீரென தான் மறைத்து வைத்திருந்த துப்பாக்கியை எடுத்து சரமாரியாக சுட்டுள்ளார். இதில் ராகுல் குமார் சம்பவ இடத்திலேயே பரிதாபமாக உயிரிழந்துள்ளார். இதைப் பார்த்து பயந்து போன உடன் படித்த சக மாணவர்கள், கோபத்தில் பிரேம் ஷங்கரை பிடித்து சரமாரியாக அடித்து உதைத்துள்ளனர். தகவலறிந்து சம்பவ இடத்திற்கு வந்த போலீசார் பிரேம் சங்கரை மாணவர்களிடமிருந்து மீட்டு மருத்துவமனைக்கு அனுப்பி வைத்தனர்.

ராகுலும், தானுவும் கடந்த 4 மாதத்திற்கு முன்புதான் திருமணம் செய்துள்ளனர். ஒரே விடுதியில் தனித்தனி மாடியில் தங்கி படித்து வந்துள்ளனர். தானுவின் தந்தை மாறுவேடத்தில் வந்து ராகுலை அணுகியதாகக் கூறப்படுகிறது. பின்னர்தான் தானுவின் தந்தை எனத் தெரியவந்து, ராகுல் அதிர்ச்சியடைந்துள்ளது. ஆனால் ராகுல் சுதாரிப்பதற்குள் சுட்டுக் கொன்று விட்டதாக சக மாணவர்கள் தெரிவித்துள்ளனர் தன் கண் முன்னாலேயே, தனது கணவர் மார்பில் துப்பாக்கியால் சுட்டுக் கொன்று விட்டதாக, தந்தை எதிராக, மகள் தானு வாக்குமூலம் அளித்துள்ளார்.