வளைவுகளே இல்லாமல் ரயில்வே மேம்பாலம் கட்டிய விவகாரம்: போபாலில் 7 இன்ஜினியர்கள் மீது பாய்ந்த நடவடிக்கை

போபால் நகரின் ஆயிஷ்பாக் பகுதியில் 18 கோடி ரூபாய் செலவில் கட்டப்பட்ட ரயில்வே மேம்பாலம் வாகனங்கள் திரும்ப வளைவு இல்லாமல் 90 டிகிரி திருப்பத்துடன் கட்டப்பட்டுள்ளது.

இந்த புதிய பாலத்தின் படங்களும் வீடியோவும் சமூக வலைதளங்களில் வெளியாகி கடும் விமர்சனத்திற்குள்ளான நிலையில் இது குறித்து விசாரணை நடத்த அம்மாநில முதலமைச்சர் மோகன் யாதவ் உத்தரவிட்டார்.

இதையடுத்து பொதுப்பணித் துறையைச் சேர்ந்த 2 மூத்த பொறியாளர்கள் உள்பட 7 பொறியாளர்கள் பணியிடை நீக்கம் செய்யப்பட்டு உள்ளனர்.

மேலும் ஓய்வுபெற்ற முதுநிலை மேற்பார்வைப் பொறியாளர் ஒருவர் மீதும் துறை ரீதியான விசாரணைக்கு மாநில அரசு உத்தரவிட்டுள்ளது.

இந்நிலையில், பாலத்தின் கட்டுமானப் பணியில் ஈடுபட்ட நிறுவனத்திற்கும், வடிவமைத்துக் கொடுத்த நிறுவனத்திற்கும் வரும் காலங்களில் எவ்வித ஒப்பந்தமும் வழங்கப்படாது என மத்திய பிரதேச மாநில முதலமைச்சர் மோகன் யாதவ் தெரிவித்துள்ளார்.