Last Updated:
சத்தீஸ்கர் மாநிலம், பிஜப்பூரில் மாவோயிஸ்ட் துணைத் தளபதி சோதி கண்ணா கொல்லப்பட்டார்.
சத்தீஸ்கர், பிஜப்பூர் மாவட்டத்தில் மாவோயிஸ்ட் குழுவினருக்கு எதிரான நடவடிக்கையில், அந்த இயக்கத்தின் துணைத் தளபதி கொல்லப்பட்டுள்ளார். ஜூலை 4 ஆம் தேதி நடந்த பாதுகாப்பு படையின் கூட்டு நடவடிக்கையில், ரூ. 8 லட்சம் வெகுமதி அறிவிக்கப்பட்டிருந்த மாவோயிஸ்ட் துணை தளபதி கொல்லப்பட்டதாக அதிகாரப்பூர்வமாக அறிவிக்கப்பட்டுள்ளது.
தெலுங்கானா மாநிலம், டெக்கல்குடியம் பகுதியில் தர்மாராம் முகாம் உள்ளிட்ட பல மாவோயிஸ்ட் தாக்குதல் சம்பவத்தில் முக்கிய நபராக இருந்தவர் அந்த இயக்கத்தின் துணை தளபதி சோதி கண்ணா.
பிஜப்பூர் மாவட்ட காவல் கண்காணிப்பாளர் ஜிதேந்திர யாதவுக்கு, மாவட்டத்தின் தேசிய பூங்காவில் மாவோயிஸ்ட் நடமாட்டம் இருப்பதாக உளவுத்துறை தகவல் கொடுத்தது. இந்தத் தகவலைத் தொடர்ந்து, டி.ஆர்.ஜி. பிஜப்பூர், கோப்ரா 210 மற்றும் சி.ஆர்.பி.எஃப் இளம் படைப்பிரிவு ஆகியவற்றை உள்ளடக்கிய பாதுகாப்புப் படையினரால் ஜூலை 4 ஆம் தேதி ஒருங்கிணைந்த தேடுதல் நடவடிக்கை தொடங்கப்பட்டது.
இந்தத் தேடுதல் வேட்டை துவங்கியபின், மாவோயிஸ்ட் படைகளுக்கும் பாதுகாப்புப் படையினருக்கும் இடையே அவ்வப்போது மோதல்கள் தொடங்கின. இதில், மாவோயிஸ்ட் அமைப்பின் துணை தளபதி கொல்லப்பட்டுள்ளார். மேலும், அவர் கொல்லப்பட்ட இடத்தில் இருந்து பல்வேறு அதிபயங்கர ஆயுதங்களும், வெடிபொருட்களும் கண்டறியப்பட்டுள்ளன.
கடந்த 18 மாதங்களில் 415க்கும் மேற்பட்ட மாவோயிஸ்ட்களின் உடல்கள் மீட்கப்பட்டுள்ளதாக பஸ்தார் காவல்துறை இன்ஸ்பெக்டர் ஜெனரல் (IG) பி. சுந்தர்ராஜ் தெரிவித்தார். இந்திய அரசு வரும் 2026ஆம் ஆண்டுக்குள் இந்தியாவில் மாவோயிஸ்ட் அழிக்கப்படும் என அறிவித்திருந்தது. இதனைத் தொடர்ந்து பெரும் அளவில் மாவோயிஸ்ட்கள் மீது தாக்குதல் சம்பவங்கள் நடைபெற்றுவருகின்றன.
July 07, 2025 4:01 PM IST
