‘ஆபரேஷன் சிந்தூருக்கு வாழ்த்து தெரிவிக்க வேண்டும்’ எனச் சொல்லி, மத்திய அமைச்சர் ஒருவரின் அப்பாயின்ட்மென்ட்டை வாங்கி, அவரைச் சந்தித்திருக்கிறார் பணிவானவரின் வாரிசுப் புள்ளி. ஆனால், வாழ்த்துத் தெரிவித்த கையோடு, தனக்கு பா.ஜ.க-வின் ‘யுவ மோர்ச்சா அணி’யில் பொறுப்பு கேட்டாராம். இதனால் அதிர்ந்துபோன அந்த அமைச்சர், ‘கட்சி விவகாரங்களைப் பேசவேண்டிய ஆளும் நானில்லை. இடமும் இது இல்லை. தப்பான அட்ரஸுக்கு வந்துவிட்டீர்கள்…’ எனக் கடிந்துகொண்டிருக்கிறார்.
ஆனாலும், அவரை விடாத வாரிசுப் புள்ளி, ‘வெங்கையா நாயுடுவின் பேரன் திருமணத்துக்காக, அமித் ஷா ஜி சென்னைக்கு வந்திருந்தபோதே, அவரிடம் என் கோரிக்கையை முன்வைத்தேன். அவரும் பார்ப்பதாகச் சொல்லியிருந்தார். நீங்களும் அழுத்தம் கொடுத்தால் எனக்கு ஒரு அங்கீகாரம் கிடைக்கும்’ என விடாப்பிடியாகக் கெஞ்சியிருக்கிறார். ஆனாலும், அந்த அமைச்சர் மறுத்துவிட, வெறும் கையோடு கிளம்பியிருக்கிறார் வாரிசு!
