பள்ளி, மத ஸ்தலங்களை குறிவைத்து தாக்கும் பாகிஸ்தான்.. மத்திய அரசு தகவல்!

பஹல்காம் தீவிரவாத தாக்குதலை தொடர்ந்து ஆபரேஷன் சிந்தூர் என்ற பெயரில் கடந்த செவ்வாய்க்கிழமை முதல் பாகிஸ்தானுக்கு இந்தியா தக்க பதிலடி கொடுத்து வருகிறது. இந்த தாக்குதல் தொடர்பாக வெளியுறவுத் துறை செயலாளர் விக்ரம் மிஸ்ரி, கர்னல் சோபியா குரேஷி மற்றும் விங் கமாண்டர் லியாமிகா சிங் ஆகியோர் மூன்றாம் முறையாக கூட்டாக செய்தியாளர்களை சந்தித்து விளக்கமளித்தனர்.

அப்போது, கோயில்கள், குருத்வாரா, தேவாலயங்கள், பள்ளிகளை குறிவைத்து பாகிஸ்தான் தாக்குதல் நடத்துவதாக வெளியுறவு செயலாளர் விக்ரம் மிஸ்ரி கூறினார். பஞ்சாப்பில் இருந்து பாகிஸ்தான் இடையேயான கர்தார்பூர் ஷாகீப் வழித்தடம் மறு உத்தரவு வரும் வரை மூடப்படுவதாக விக்ரம் மிஸ்ரி கூறினார்.

எல்லையோர மாநிலங்களில் 36 இடங்களை குறிவைத்து பாகிஸ்தான் ஏவிய 300 முதல் 400 ட்ரோன்களை வானிலேயே இடைமறித்து அழிக்கப்பட்டதாக கர்னல் சோபியா குரேஷி தெரிவித்தார். பயணிகள் விமான வழித்தடத்தை பாகிஸ்தான் இன்னும் மூடவில்லை என்றும் பயணிகள் விமானங்களை கேடயமாக பயன்படுத்துவதாகவும் விங் கமாண்டர் வியோமிகா சிங் ஆதாரங்களுடன் விளக்கம் அளித்தார். இந்தியாவின் வான் பாதுகாப்பு சாதனங்களின் இயக்க முறைகளை அறியவும், உளவுத் தகவல்களை தெரிந்து கொள்ளவும் பாகிஸ்தான் முயற்சித்ததாக கூறினர்.