பிரிட்டன் இளவரசர் ஹாரி பிபிசி ஊடகத்திற்கு அளித்த நேர்காணல் ஒன்றில் தனது மனைவி, குழந்தைகளுடன் மீண்டும் அரச குடும்பத்தில் இணைய விருப்பம் தெரிவித்து உருக்கமாக பேசியிருக்கிறார்.
பிரிட்டன் மன்னர் சார்லஸ்க்கும் மறைந்த இளவரசி டயானாவிற்கும் பிறந்தவர் இளவரசர் ஹாரி. இவர் கடந்த 2018 ஆம் ஆண்டு மேகன் மார்க்கல் என்ற அமெரிக்க நடிகையை காதலித்து திருமணம் செய்து கொண்டார் ஹாரி. பிரிட்டன் அரச குடும்பத்தின் வெள்ளையர் அல்லாத முதல் இளவரசி என்ற பெருமையையும் மேகன் மார்க்கல் பெற்றார்.
திருமணத்திற்கு பிறகு மேகன் ஒரு நடிகை, வெள்ளையர் அல்லாதவர் என்ற காரணங்களை காட்டி அவருக்கு எதிராக அரச குடும்பத்தில் பல்வேறு எதிர்ப்புகள் எழுந்தன. இந்த பிரச்னை அரச குடும்பத்தை தாண்டி பிரிட்டன் மக்களிடையையும், ஊடகங்களிடையேயும் பரவியது.
இதனால் இளவரசர் ஹாரி 2020 ஆம் ஆண்டு தானும் தன்னுடைய மனைவி மேகன் மற்றும் குழந்தை அனைவரும் அரச குடும்பத்தில் இருந்து விலகுவதாக அறிவித்தார். பின்னர் தனது திருமணத்துக்கு ராணி எலிசபெத் பரிசாக தந்த சசெக்ஸ் அரண்மனையை விட்டு வெளியேறி குடும்பத்துடன் அமெரிக்காவில் குடியேறினார். 2024 -இல் இளவரசர் ஹாரி தன்னுடைய நிறுவனத்தின் ஆண்டறிக்கையிலும் தன்னுடைய நாடாக அமெரிக்காவை குறிப்பிட்டிருந்ததாக செய்திகள் வெளியாகி பேசுபொருளாகியிருந்தது.
