ஜம்மு-காஷ்மீரின் பஹல்காமில் தீவிரவாதிகள் நடத்தியத் துப்பாக்கிச் சூடு சம்பவம் நாட்டையே உலுக்கியிருக்கிறது. சுற்றுலாப் பயணிகள் மீது நடத்தப்பட்ட இந்தத் திடீர் துப்பாக்கிச் சூட்டில் இதுவரை வெளிநாட்டினர் 2 பேர் உள்ளிட்ட 26 சுற்றுலாப் பயணிகள் உயிரிழந்திருப்பதாகவும், காயமடைந்தவர்கள் சிகிச்சைப் பெற்று வருவதாகவும் தகவல்கள் வெளியாகியிருக்கின்றன.
இந்தத் தாக்குதலை நடத்திய தீவிரவாதிகளைப் பிடிக்கும் பணியில் பாதுகாப்புத் துறை தீவிரமாக இறங்கியிருக்கிறது. இந்தத் தாக்குதலை நடத்திய கோழைத்தனமான தீவிரவாதிகளுக்கும், அவர்களுக்குப் பின்னால் இருக்கும் கும்பலுக்கும் தக்க பதிலடி கொடுக்கப்படும் என மத்தியப் பாதுகாப்புத் துறை தெரிவித்திருக்கிறது.
கடந்த ஏப்ரல் 16-ம் தேதி திருமணத்தை முடித்து மனைவியுடன் சுற்றுலா சென்ற இந்திய கடற்படை அதிகாரி லெப்டினன்ட் வினய் நர்வால், தீவிரவாதிகளின் துப்பாக்கிச் சூட்டில் உயிரிழந்தார். திருமணமான 4 நாள்களில் கணவனை இழந்த அவரது மனைவி சம்பவ இடத்திலேயே அவரது உடலை மடியில் வைத்து கதறி அழுத புகைப்படங்கள் பார்ப்பவர்களைச் சோகத்தில் ஆழ்த்தியது.
