‘விஜய்யை இஸ்லாமியர்கள் புறக்கணிக்க வேண்டும்’ – ஃபத்வா வெளியிட்ட முஸ்லிம் அமைப்பு

ரமலான் நோன்பையொட்டி நடிகர் விஜய் கடந்த மார்ச் 7 ஆம் தேதி சென்னை ஒய்.எம்.சி.ஏ. மைதானத்தில் நடைபெற்ற இப்தார் நோன்பு திறப்பு நிகழ்ச்சியில் பங்கேற்றதுடன் அதைத் தொடர்ந்து நடைபெற்ற தொழுகையிலும் கலந்து கொண்டார். இந்த நிகழ்வு தமிழகத்தில் பரபரப்பை ஏற்படுத்தியிருந்தது.

இதுகுறித்து விஜய்யை ஆதரித்தும் விமர்சித்தும் கருத்துகள் தெரிவிக்கப்பட்டன. இந்த நிலையில் அகில இந்திய முஸ்லிம் ஜமாத் என்ற அமைப்பு விஜய்க்கு கண்டனம் தெரிவித்து ஃபத்வா வெளியிட்டுள்ளது. அதில் கூறப்பட்டுள்ளதாவது-

குடிகாரர்கள், சூதாட்டக்காரர்கள் மற்றும் சமூக விரோதிகளை இப்தார் விருந்துக்கு அழைப்பது சட்டவிரோதமானது மற்றும் பாவமானது. அத்தகைய நபரை நம்ப வேண்டாம். அவரைத் தங்கள் நிகழ்ச்சிகளுக்கு அழைக்க வேண்டாம். அவரிடமிருந்து தமிழக முஸ்லிம்கள் விலகியிருக்க வேண்டும் என்று கூறப்பட்டுள்ளது.