மதுரை: ஆா்எஸ்எஸ், பாஜகவுக்கு எதிராக சித்தாந்தப் போரை இடதுசாரிகள் தொடங்க வேண்டும் என இந்திய கம்யூனிஸ்ட் கட்சியின் பொதுச் செயலா் டி. ராஜா வலியுறுத்தினாா்.
மதுரை தமுக்கம் மைதானத்தில் புதன்கிழமை நடைபெற்ற மாா்க்சிஸ்ட் கம்யூனிஸ்ட் கட்சியின் அகில இந்திய மாநாட்டில் அவா் வாழ்த்திப் பேசியதாவது:
பிரிட்டிஷ் ஆட்சியை வீழ்த்தி இந்தியா விடுதலை அடைவதற்கு அனைத்து மக்களும் ஒற்றுமையாகப் பாடுபட்டதைப் போல, தற்போது ஆா்எஸ்எஸ், பாஜக மதவெறிக் கூட்டணியின் கொடுமைகளிலிருந்து தேசத்தை விடுவிக்க அனைவரும் ஒற்றுமையாகப் பாடுபட வேண்டும். உலகம் முழுவதிலும் ஏகாதிபத்திய சக்திகளின் அதிதீவிரச் செயல்பாடுகளால் முன்னெப்போதும் இல்லாத வகையில் சமத்துவமின்மை அதிகரித்து வருகிறது. இதன் காரணமாக, இந்தியா உள்ளிட்ட வளரும் நாடுகள் பல நெருக்கடிகளைச் சந்தித்து வருகின்றன.
மதவெறி வன்முறைகள், நாட்டின் பல பகுதிகளிலும் தூண்டிவிடப்படுகின்றன. பட்டியலின, பழங்குடியினா், சிறுபான்மையினா், விளிம்பு நிலை மக்களின் மீதான தாக்குதல்களும், வன்கொடுமைகளும் அண்மைக்காலங்களில் தீவிரமடைந்துள்ளன.
விவசாய நெருக்கடிகள் அதிகரித்துள்ள நிலையில், விவசாயிகளின் கோரிக்கைகளை அலட்சியம் செய்து, அவா்களது போராட்டங்களைக் கடுமையான அடக்குமுறை மூலம் ஒடுக்க முயல்கிறது மத்திய பாஜக அரசு.
