மத்திய அரசு ஊழியர்களுக்கு ஹேப்பி நியூஸ்.. அமைச்சரவை கூட்டத்தில் முக்கிய முடிவு

மத்திய அமைச்சரவைக் கூட்டம் பிரதமர் நரேந்திர மோடி தலைமையில் நடைபெற்றது. இதில் மத்திய அரசு ஊழியர்களுக்கான அகவிலைப்படியை இரண்டு சதவிகிதம் உயர்த்த அனுமதி அளிக்கப்பட்டது. அதன்படி தற்போதுள்ள அகவிலைப்படி 53 சதவிகிதத்தில் இருந்து 55 சதவிகிதமாக உயர்த்தப்படுகிறது.

அகவிலைப்படி உயர்வு கடந்த ஜனவரி ஒன்றாம் தேதி முதல், முன்தேதியிட்டு அரசு ஊழியர்களுக்கு வழங்கப்பட உள்ளது. இதன் மூலம் 48 லட்சத்து 66 ஆயிரம் மத்திய அரசு ஊழியர்களும், 66 லட்சத்து 55 ஆயிரம் ஓய்வூதியதாரர்களும் பயன்பெறுவர்.

இதையும் படியுங்கள் : குணால் கம்ராவுக்கு இடைக்கால முன் ஜாமீன் – சென்னை உயர் நீதிமன்றம் உத்தரவு

ஏழாவது ஊதியக் குழு பரிந்துரைகளின் படி அகவிலைப்படி உயர்த்தப்பட்டுள்ளது. அகவிலைப்படி உயர்வு மூலம் அரசுக்கு ஆண்டுக்கு 6,614 கோடி ரூபாய் கூடுதல் செலவு ஏற்படும் என்று கருதப்படுகிறது.

அரசு ஊழியர்கள் மற்றும் ஓய்வூதியம் பெறுவோர் எதிர்கொள்ளும் பணவீக்கத்தின் தாக்கத்தை ஈடுசெய்ய, அகவிலைப்படி மற்றும் அகவிலை நிவாரணம் ஆகியவை அவ்வப்போது திருத்தப்படுகின்றன.

இதற்கு முன் கடந்த ஆண்டு ஜூலையில் அகவிலைப்படி 50 விழுக்காட்டில் இருந்து 53 விழுக்காடாக உயர்த்தப்பட்டிருந்தது குறிப்பிடத்தக்கது.