RRB Junior Engineers Recruitment 2024 : இந்தியன் ரயில்வேயில் ஜூனியர் இன்ஜினியர், டிப்போ பொருள் கண்காணிப்பாளர், இரசாயன மற்றும் உலோகவியல் உதவியாளர், இரசாயன கண்காணிப்பாளர் மற்றும் உலோகவியல் கண்காணிப்பாளர் உள்ளிட்ட பதவிகளில் உள்ள 7,951 காலிப்பணியிடங்களை நிரப்புவதற்கான அறிவிப்பை இந்தியன் ரயில்வே ஆட்சேர்ப்பு வாரியம் வெளியிட்டு விண்ணப்பங்கள் ஆகஸ்ட் 17ஆம் தேதி முதல் பெறப்பட்டு வருகிறது.
இரசாயன & உலோகவியல் கண்காணிப்பாளர்/ஆராய்ச்சி ஆகிய பதவிகளுக்கு 17 காலிப்பணியிடங்களும், ஜூனியர் இன்ஜினியர், டிப்போ பொருள் கண்காணிப்பாளர், இரசாயன மற்றும் உலோகவியல் உதவியாளர் பதவிக்கு 7,934 காலிப்பணியிடங்களும் நிரப்பப்படுகிறது. இரசாயன & உலோகவியல் கண்காணிப்பாளர்/ஆராய்ச்சி பதவிக்கான 17 இடங்கள் கோரக்பூரில் மட்டும் உள்ளது.
என்ன வயதினர் விண்ணப்பிக்கலாம்?
இந்தியன் ரயில்வேயில் உள்ள இப்பணியிடங்களுக்கு 01.01.2025 ஆம் தேதியின் படி குறைந்தபட்சம் 18 வயது முதல் அதிகபட்சம் 36 வயது வரை இருக்கலாம். மேலும், விண்ணப்பதார்கள் 01.01.2007 ஆம் தேதிக்கு பின்னர் பிறந்திருக்க வேண்டும். அதே போல், பொதுப்பிரிவினர் 02.01.1989 ஆம் தேதிக்கு பின்னர் பிறந்திருக்கக்கூடாது. ஒபிசி பிரிவினர் 02.01.1986 தேதிக்கு பின்னர் பிறந்திருக்கக்கூடாது. எஸ்சி/எஸ்டி பிரிவினர் 02.01.1984 ஆம் தேதிக்கு பின்னர் பிறந்திருக்கக்கூடாது. கூடுதலாக எஸ்சி/எஸ்டி பிரிவினருக்கு 5 வருடங்கள், ஒபிசி பிரிவினருக்கு 3 வருடங்கள், மாற்றுத்திறனாளிகளுக்கு 10 முதல் 15 வருடங்கள் வரை வயது வரம்பில் தளர்வு உள்ளது.
எவ்வளவு சம்பளம் :
இந்தியன் ரயில்வேயில் மத்திய அரசு 7வது ஊதிய குழுவின் படி மாத சம்பளம் வழங்கப்படுகிறது.
இரசாயன & உலோகவியல் கண்காணிப்பாளர்/ஆராய்ச்சி பதவிகளுக்கு நிலை 7-யின் படி குறைந்தபட்ச ரூ.44,900 முதல் அதிகபட்சமாக ரூ.1,42,400 வரை மாத சம்பளம் வழங்கப்படும்.
ஜூனியர் இன்ஜினியர், டிப்போ பொருள் கண்காணிப்பாளர், இரசாயன மற்றும் உலோகவியல் உதவியாளர் பதவிக்கு நிலை 6-யின் படி குறைந்தபட்ச ரூ.35,400 முதல் அதிகபட்சமாக ரூ.1,12,400 வரை மாத சம்பளம் வழங்கப்படும்.
பொறியியல் படித்தவர்கள் விண்ணப்பிக்கலாம்
- இந்தியன் ரயில்வேயில், எலெக்ரிக்கல், டிசைன் வடிவமைப்பு, மெக்கானிக்கல், சிவில், தொலைத்தொடர்பு மற்றும் டீசல் மெக்கானிக்கல் ஆகிய பிரிவுகளில் உள்ள ஜூனியர் இன்ஜினியர் பதவிகளுக்கு அங்கீகரிக்கப்பட்ட பல்கலைக்கழகத்தில் இருந்து மெக்கானிக்கல் / எலக்ட்ரிக்கல் / எலெக்ட்ரானிக்ஸ் / உற்பத்தி / மெகாட்ரானிக்ஸ் / தொழில்துறை / எந்திரம் / கருவிகள் மற்றும் கட்டுப்பாடு / கருவிகள் மற்றும் இயந்திரம் / கருவிகள் மற்றும் டை மேக்கிங் / ஆட்டோமொபைல் / உற்பத்தி பொறியியல்/ சிவில் ஆகிய பொறியியல் பிரிவுகளில் 3 ஆண்டுகள் டிப்ளமோ அல்லது B.E/B.Tech டிகிரி பெற்றிருக்க வேண்டும்.
- இரசாயன கண்காணிப்பாளர்/ஆராய்ச்சி பதவிகளுக்கு வேதியியல் தொழில்நுட்பத்தில் டிகிரி பெற்றிருக்க வேண்டும் அல்லது அதற்கு நிகரான பிரிவில் டிகிரி பெற்றிருக்க வேண்டும்.
- உலோகவியல் கண்காணிப்பாளர்/ஆராய்ச்சி பதவிகளுக்கு உலோகவியல் இன்ஜினியரிங் டிகிரி முடித்திருக்க வேண்டும்.
- இரசாயன மற்றும் உலோகவியல் உதவியாளர் பதவிக்கு இயற்பியல்/ வேதியியலில் இளங்கலை டிகிரி பெற்றிருக்க வேண்டும்.
- டிப்போ பொருள் கண்காணிப்பாளர் பதவிக்கு ஏதேனும் ஒரு பொறியியல் பாடத்தில் டிகிரி முடித்திருக்க வேண்டும்.
எழுத்துத் தேர்வு நடத்தப்படும்
இந்தியன் ரயில்வேயில் உள்ள 7,951 காலிப்பணியிடங்களுக்கு நான்கு கட்ட ஆட்சேர்ப்பு நடைமுறை பின்பற்றப்படும். இரண்டு கட்ட கணினி வழி எழுத்துத் தேர்வு நடைபெறும். முதல் கட்டத்தில் தகுதி அடையும்பட்சத்தில் இரண்டாம் கட்ட கணினி வழி தேர்வு எழுத வேண்டும். அதில் தேர்ச்சி அடைபவர்களுக்கு சான்றிதழ் சரிபார்ப்பு மற்றும் மருத்துவ பரிசோதனை நடைபெறும்.
எப்படி விண்ணப்பிப்பது?
ஆர்வமும் தகுதியுள்ளவர்கள் https://www.rrbchennai.gov.in/ என்ற ரயில்வே ஆர்சேர்ப்பு வாரியத்தில் இணையத்தளத்தில் ஆன்லைன் வழியாக விண்ணப்பிக்க வேண்டும். இப்பணியிடங்களுக்கு 29.08.2024ஆம் தேதி வரை ஆன்லைன் வழியாக விண்ணப்பிக்க வேண்டும். ஆன்லைனில் திருத்தம் செய்ய 30.08.2024 முதல் 08.09.2024 தேதி வரை செய்துகொள்ளலாம். கணினி வழியாக நடைபெறும் தேர்வுகள் குறித்த விவரங்கள் பின்னர் அறிவிக்கப்படும்.
ரயில்வே துறையை பொருத்தவரை தமிழர்களுக்கு கிடையாது. அதில் உள்ள காலி பணியிடங்கள் அனைத்தும் ஒன்று வட மாநிலத்தைச் சார்ந்தவர்களுக்கு கொடுப்பார்கள் அடுத்து கேரளா மாநிலத்தைச் சார்ந்த நபர்களுக்கு வழங்குவார்கள்